رووداو دیجیتاڵ
بەشێک لە دانیشتووانی هەولێر بە دەنگی تەقینەوە رۆژەکەیان دەستپێکرد. سەرچاوەی دەنگەکە تەقینەوەی بەنزینخانەیەک بوو.
کاژێر 8 بۆ 8:30ـی بەیانی لە کاتی بەتاڵکردنی سووتەمەنی لەلایەن تانکیێکی بەنزین لە بەنزینخانەیەکی گەڕەکی فەرمانبەرانی هەولێر بەنزینخانەکە تەقییەوە.
بەهۆی تەقینەوەکە، تەواوی بەنزینخانەکە و پێنج ئۆتۆمبێل سووتان و پێنج کەس بریندار بوون.
هێرش عەبدولقادر، خاوەنی بەنزینخانەکە رایگەیاند، "زیانەکە زیانی مادی بووە و شۆرتی بەنزین بوو بەهۆی بەتاڵکردنی بەنزین. 5 کەس بە سووکی بریندار بوون."
هێزی تەقینەوەکان بە جۆرێک بوو، جامی خانووەکانی دەورووبەری بەنزینخانەکە شکاون. بەشێکی خەڵک پێیان وابووە بۆردوومان یان بوومەلەرزە روویداوە، ئەوەی لەو دەوروبەرە بووە زیان بە خانوو و ئۆتۆمبێلیان گەیشتووە.
هەڤاڵ نەجات، وەستای کارەبایە و ماڵی لە نزیک بەنزینخانەکەیە و دەڵێت، "سوپاس بۆ خودا کەسمان لە ماڵ نەبووین، پرسەمان هەبوو و خێزانەکەم برد بۆ پرسەکە و خۆیشم چووم بۆ سەر کار."
بەنزینخانەکە لە بەرامبەر قوتابخانەیەک و لەنێو ئاوەدانییە، ئەمڕۆ لە قوتابخانەکە پشوو بووە، ئەگەر نا زیانێکی زۆر بەر قوتابییەکان دەکەوت.
بە گوتەی بەرگری شارستانیی هەولێر، "بەتاڵکردنی سووتەمەنی بە شێوەیەکی هەڵە و نزیک بوونی بارهەڵگرەکانی سووتەمەنی لە موەلیدەی کارەبا و غازی ئێڵ پی جی" هۆکاری ئاگرکەوتنە و تەقینەوەی بەنزیخانەکە بووە.
