رووداو دیجیتاڵ
سەرۆکی دەستەی هەڵبژاردنەکانی هەرێمی کوردستان لە کۆمیسیۆنی هەڵبژاردنەکانی عێراق بە تۆڕی میدیایی رووداوی راگەیاند، ئەو کەسانەی کێشە لە کارتی بایۆمەترییان دا هەبووە، یان دەنگدەری گشتی بوون و چوونەتە نێو کەرتی سەربازییەوە و بوونەتە دەنگدەری تایبەت، کاروباری کارتەکانیان تەواو بووە و دەتوانن وەریبگرنەوە.
نەبەرد عومەر گوتی، "پێویستە ئەو دەنگدەرانە سەردانی نزیکترین ناوەند بکەن و کارتەکانیان وەربگرنەوە، بەشێکیشیان کۆمیسیۆن خۆی پەیوەندییان پێوە دەکات."
بەگوێرەی ئاماری کۆمیسیۆنی هەڵبژاردنەکان، لە وەزارەتی ناوخۆی هەرێمی کوردستان 124 هەزار و 312 کەس مافی دەنگدانیان هەیە. لە وەزارەتی پێشمەرگەش 145 هەزار و 907 کەس.
بە گوتەی سەرۆکی دەستەی هەڵبژاردنەکانی هەرێمی کوردستان، ژمارەی ئەو دەنگدەرانەی لە هەرێمی کوردستان کە کێشە لە کارتی بایۆمەترییان دا هەبووە، یان دەنگدەری گشتی بوون و بوونەتە دەنگدەری تایبەت، نزیکەی 20 هەزار کەسن.
هەڵبژاردنی پەرلەمانی عێراق لە 11ی تشرینی دووەمی ئەم ساڵ دەکرێت. بەگوێرەی ئامارەکانی کۆمیسیۆن، 29 ملیۆن کەس مافی دەنگدانیان هەیە، بەڵام 7 ملیۆن و 600 هەزار کەس بەهۆی نەبوونی کارتی دەنگدانەوە ناتوانن بەشداری بکەن.
