رووداو دیجیتاڵ
7 ساڵە و سێیەم هەڵبژاردنە عێراق بە ئامێری ئەلکترۆنی هەڵبژاردن دەکات،ئامێرەکان وا پرۆگرام کراون،خۆکارانە 7ـی بەیانی کار دەکەن تاوەکو کاژێر 6ـی ئێوارەی هەمان رۆژ،پاشان دەوەستن و هیچ دەنگێک وەرناگرن .
ئەیسەر یاسین، بەڕێوەبەری هۆبەی مەشق و راهێنان لە لقی هەولێری کۆمیسیۆنی باڵای سەربەخۆی هەڵبژاردنەکانی عێراق بە تۆڕی میدیایی رووداوی راگەیاند:" ئامێرەکان 11 کاژێر کار دەکەن، 7ـی بەیانی تاوەکو 18:00 کار دەکەن و پاشان دەوەستن،واتە دوای تەواوبوونی ئەو کاتەی دیاریکراوە ئامێرەکان خۆکارانە دەوەستن .''
کۆمیسیۆن خەڵک ئاگادار دەکاتەوە پێش ئەو کاتەی دیاریکراوە، بچن دەنگ بدەن، چونکە بە هیچ شێوەیەک کات درێژ ناکرێتەوە و ئەلیکترۆنییە، خەڵک لەماوەی ئەو 11 کاژێرە دەتوانن دەنگ بدەن."
لەبارەی هەڵەی خەڵک لە دەنگدان، بەڕێوەبەری هۆبەی مەشق و راهێنان لە لقی هەولێری کۆمیسیۆن دەڵێ : "ئەگەر کارتی دەنگدان بە بەتاڵی جێبهێڵن یان دوو بەربژێر هەڵبژێرن، دەنگەکەیان دەسووتێت، بۆیە پێویستە دڵنیابنەوە تەنیا یەک بەربژێر یان یەک لیست هەڵدەبژێرن."
بەپێی زانیاری کۆمیسیۆنی باڵای هەڵبژاردنەکانی عێراق بۆ رووداو:" هەموو ئامێرەکان دابەشکراون بەسەر کۆگەکانی کۆمیسیۆن لە پارێزگەکاندا، 70 هەزار ئامێر لە هەموو بنکەکاندا دادەنرێن،چەند رۆژێک پێش دەنگدان دەبرێنە بنکەکانی دەنگدان و جێگیر دەکرێن.''
کۆمیسیۆن ئامێری یەدەگیشی داناوە بۆ جێگرتنەوەی ئەوانەی لەو رۆژەدا کارناکەن و دەڵێ هەموو ئامێرەکان بەسەر 41 هەزار وێستگەی دەنگداندا دابەش دەکرێ.''
بڕیارە هەڵبژاردنی پەرلەمانی عێراق لە 11ی تشرینی دووەمی ئەم ساڵ بکرێت، پەرلەمانی عێراق لە 329 کورسی پێکدێت، کە 320یان گشتی و 9ەکەی دیکە کۆتان؛ زیاتر لە 7000 کەس خۆیان بۆ هەڵبژاردن بەربژێر کردووە.
