رووداو دیجیتاڵ
سەرۆکی هاوپەیمانیی رزگارکردنی کەرکووک، نیگەرانیی خۆی لە "هاوئاهەنگی نەکردنی ژمارەیەک وەزارەت و دامودەزگای حکومی لە پارێزگای کەرکووک" لەگەڵ بەربژێرەکاندا دەربڕی، بەتایبەتی لەبارەی پێدانی مۆڵەتی فەرمی بۆ بانگەشەی هەڵبژاردن.
عەمار کەهیە، سەرۆکی هاوپەیمانیی رزگارکردنی کەرکووک رۆژی دووشەممە 13-10-2025 لە راگەیێندراوێکدا ئاماژەی بەوە کردووە، ئەو دامودەزگایانە رێگرن لە بەڕێوەچوونی بانگەشەی هەڵبژاردن و پەیوەندیکردن بە جەماوەرەوە، "سەرەڕای ئەوەی دەستوور و یاسا کارپێکراوەکان ئەو مافەیان بۆ بەربژێرەکان مسۆگەر کردووە."
سەرۆکی هاوپەیمانیی رزگارکردنی کەرکووک جەخت لەوە دەکاتەوە، "خۆدزینەوەی هەندێک فەرمانگە، بەتایبەتی بەڕێوەبەرایەتییەکانی پەروەردە و زانکۆ و پەیمانگەکان، لە پێدانی ئەم دەرفەتە یاساییە بە بەربژێرەکان، جۆرێکە لە جیاکاریی بێ پاساو لەنێوان بەربژێر و پارتەکاندا." هاوپەیمانیی رزگارکردنی کەرکووک ئەو کارانە بە "پێشێلکردنی بنەمای یەکسانیی دەرفەتەکان و بناخەی دادپەروەریی هەڵبژاردن" ناودەبات.
کەهیە داوا لە سەرۆکوەزیرانی عێراق دەکات، "لێکۆڵینەوەیەکی خێرا لە دژی ئەو دامودەزگایانە بکات کە کۆسپ بۆ پرۆسەی دیموکراسی لە عێراقدا دروستدەکەن." هەروەها رێکاری یاسایی بەرامبەر هەموو ئەو کەسانە بگیرێتەبەر کە "هەوڵی دانانی کاریگەری یان کەمکردنەوەی بەشداریی سیاسی دەدەن، یان سیستمی دیموکراسی دەکەنە ئامانج کە گەلی عێراق پەسندی کردووە."
لە کەرکووک 250 بەربژێر، کێبڕکێ لەسەر 12 کورسیی گشتی و کورسییەکی کۆتای پەرلەمانی عێراق دەکەن.
