رووداو دیجیتاڵ
سەرچاوەیەک لە وەزارەتی دارایی رایگەیاند، وردبینی لە لیستی مووچەی مانگی ئاب تەواو بووە؛ باسی لەوەشکرد: "بەئەگەری زۆر سبەی بڕیاری خەرجکردنی دەدرێت، راستەوخۆ دوای تەواوبوونی رێکارەکان 120 ملیار دینار لە داهاتی نانەوتیی ئەو مانگە بۆ بەغدا دەنێردرێت."
نزیکەی دوو هەفتە بەسەر کۆبوونەوەکەی محەممەد شیاع سوودانی، سەرۆکوەزیرانی عێراق، لەگەڵ وەزیرانی کوردی نێو حکومەتی عێراق تێدەپەڕێت، کە تێیدا بەڵێنی خەرجکردنی مووچەی مانگی ئابی هەرێمی کوردستانی پێدان، بەڵام هێشتا ئەو بەڵێنە جێبەجێ نەکراوە.
رۆژی شەممە، 18ـی تشرینی یەکەمی 2025، سەرچاوەیەک لە وەزارەتی دارایی هەرێمی کوردستان بە تۆڕی میدیایی رووداوی راگەیاند، "هەفتەی رابردوو پێکەوە وردبینی لە هەردوو لیستی مانگی ئاب و ئەیلوول دەستی پێکردبوو، وردبینی لە لیستی مووچەی مانگی ئاب تەواو بووە و هیچ کێشەیەکی نەبووە، بۆیە وابڕیارە سبەی بڕیاری خەرجکردنی مووچەی مانگی ئاب بدرێت."
بەگوێرەی سەرچاوەکەی رووداو، "دوای ئەوەی مووچەی مانگی ئاب خەرج کرا، راستەوخۆ رێکارەکانی ناردنی 120 ملیار دیناری داهاتی نانەوتی بۆ بەغدا دەست پێدەکات. ئەگەر رێکارەکان تەواو بوون، هەر ئەو رۆژە 120 ملیار دینارەکە دەنێردرێت، ئەگەرنا بە دڵنیایییەوە رۆژی دواتر."
ئەو سەرچاوەیە ئاماژەی بەوەش کرد، "ناوی هەندێک خانەنشین بۆ لیستی مووچەی مانگی ئاب زیاد کراون، ئەگەرنا گۆڕانکارییەکی ئەوتۆ نەکراوە."
لەبارەی لیستی مووچەی مانگی ئەیلوولیشەوە، سەرچاوەکەی رووداو گوتی، "وردبینی لە لیستی مووچەی مانگی ئەیلوول بەردەوامە و بڕیارە بە زووترین کات تەواو بکرێت، تاوەکو دوای مووچەی مانگی ئاب و رێکارەکان، هەوڵ بدرێت بۆ ئەوەی مووچەی مانگی ئەیلوولیش خەرج بکرێت."
رۆژی 23-09-2025، ئەنجوومەنی وەزیرانی عێراق کۆبووەوە و بڕیاری دا مووچەی مانگی تەممووزی مووچەخۆرانی هەرێمی کوردستان خەرج بکات.
لەکاتێکدا وەزارەتی دارایی عێراق هەفتەی داهاتوو دەست بە دابەشکردنی مووچەی مانگی 10 دەکات، لە هەرێمی کوردستان مووچەخۆران هێشتا لە چاوەڕوانیی مووچەی مانگی هەشتدان.
