رووداو دیجیتاڵ
بافڵ تاڵەبانی، سەرۆکی یەکێتیی نیشتمانیی کوردستان لە هەولێر رایدەگەیێنێت، حیزبەکەی هەوڵ دەدات رێککەوتنێکی هەمیشەیی لەگەڵ حکومەتی عێراق بکرێت بۆ پرسی مووچەی مووچەخۆرانی هەرێمی کوردستان.
بافڵ تاڵەبانی، ئێوارەی رۆژی شەممە، 1ی تشرینی دووەمی 2025، لە چوارچێوەی هەڵمەتی بانگەشەی هەڵبژاردن لە شاری هەولێر، گوتارێکی پێشکێش بە ئەندامان و لایەنگرانی حیزبەکەی کرد و راگەیاند: "ئێمە دەنگ و سەنگ و هێزی ئێوەین لە بەغدا". باسی لەوە کرد، کە یەکێتی دەیەوێت رێککەوتنێکی هەمیشەیی لەگەڵ حکومەتی بەغدا بکرێت، "تاوەکو ئەم دوودڵی و ئازارەی لەنێو دڵتاندا هەیە نەمێنێت."
سەبارەت بە پرسی بودجە، سەرۆکی یەکێتی بەڵێن دەدات و دەڵێ: "بودجەی کوردستان وەکو ساڵانی 2004 بۆ 2013ـی لێ دەکەینەوە، ئەوکات چۆن بوو، دەبێت وابێت، ئەگەر باشتر نەبێت، دەچینە بەغدا پڕۆژەی گەورە بۆ کوردستان دەهێنین، بەڵام یەکێتییانە لە زاخۆوە تاوەکو هەڵەبجە، هەموو کوردستان بەیەک چاو سەیر دەکەین."
بافڵ تاڵەبانی دەڵێت: "دەزانن ئێمە لە بەغدا بەهێزین، کوردستان جوان دەکەینەوە و بەرگریی لێ دەکەین. ئەو پردانەی لەنێوان ئێرە و عێراق سووتاندوویانە، زیندوو و چاکیان دەکەینەوە و سەقامگیری دەگەڕێنینەوە بۆ کوردستان."
یەکێتیی نیشتمانیی کوردستان لە بازنەی هەولێر 30 بەربژێری هەن، چاوی لە بەشێکی 16 کورسییەکەی هەولێرە، حیزبەکە بە زیاتر لە 150 بەربژێر لە 7 بازنەی هەڵبژاردن رکابەری لەگەڵ لایەنەکان دەکات.
.jpg&w=3840&q=75)
