رووداو دیجیتاڵ
لە رۆژی شەممەوە شەپۆلێکی بارانبارین سنووری مەریوانی پارێزگای سنە گرتووەتەوە. ئەمە یەکەم بارانی پاییزی ئەم ساڵە.
لە ماوەیەکی کەمدا بارانێکی زۆر باری و بووە هۆی پەنگخواردنەوەی ئاو لە شەقامەکان.
لە 24 کاژێری رابردوودا زۆرترین ئاستی بارانبارین لە پارێزگای سنە، لە شاری مەریوان تۆمارکراوە و زیاتر لە 30 ملیمەتر باران لەو شارە باریوە.
خەڵکی مەریوان بە بارینی باران دڵخۆشن، بەڵام هێشتا نیگەرانییەکانیان لەبارەی ئەگەری بەردەوامیی وشکەساڵی نەڕەویوەتەوە.
ئێران و رۆژهەڵاتی کوردستان لە شەشەمین ساڵی وشکەساڵیدان و وڵاتەکە رووبەڕووی قەیرانێکی کەموێنەی ئاو بووەتەوە و چەندین شاری گەورەی وەک تاران، کەرەج و مەشهەد کێشەی ئاوی خواردنەوەیان هەیە.
بە پێی پێشبینییەکانی بەڕێوەبەرایەتیی کەشناسیی پارێزگای سنە، شەپۆلی بارانبارینەکە لە سنووری پارێزگاکە تاوەکو کۆتایی رۆژی دووشەممە بەردەوام دەبێت، لە ناوچە شاخاوییەکانیش پلەی گەرما دادەبەزێ و ئەگەری بارینی بەفر هەیە.
