رووداو دیجیتاڵ
هەردوو کەشناسیی هەرێمی کوردستان و عێراق دەڵێن، هیچ ئاماژەیەک بۆ بارانبارینی بەخووڕ لە هیچ ناوچەیەکی هەرێمی کوردستان نییە.
ئەمڕۆ چوارشەممە 10ی 12ی 2025، عامر جابری، گوتەبێژی دەستەی کەشناسی و بوومەلەرزەزانی عێراق بە رووداوی راگەیاند، ئەو شەپۆلە بارانبارینەی عێراق و باشووری کوردستانی گرتبووەوە، بەرەو لاوازبوون دەچێ.
گوتەبێژی دەستەی کەشناسی و بوومەلەرزەزانی عێراق گوتیشی، "دۆخەکە بۆ ئەمڕۆش تاڕادەیەک بە ناسەقامگیری دەمێنێتەوە، بەڵام هیچ ئاماژەیەک بۆ بارانبارینی بەخووڕ لە هیچ ناوچەیەکی هەرێمی کوردستان نییە."
هاوکات کەشناسیی هەرێمی کوردستان گوتی، "بە گوێرەی وێنەی مانگی دەستکرد، ئێستا ئاسمان بە گشتی هەورە و شەپۆلی بارانبارین لەسەر ناوچەکەمان لاواز بووە."
دوێنێ سێشەممە 9-12-2025، لافاو لە چەند ناوچەیەکی باشووری کوردستان دروستبوو و 3 کەس گیانیان لەدەستدا. قایمقامی چەمچەماڵ گوتی، زیان بەر 500 ماڵ و 100 دووکان کەوتووە.
