رووداو دیجیتاڵ
سەرۆکی ئەنجوومەنی بازاڕی دراوی هەولێر رایگەیاند، لە ئەمڕۆ سێشەممەوە بڕیارێکی نوێ بۆ رێکخستنەوەی جۆری دۆلار لە بازاڕ جێبەجێ دەکرێت و رێژەی دۆلاری سپی لە مامەڵەکاندا بۆ 28٪ کەم دەکرێتەوە.
رۆژی دووشەممە، 15ـی کانوونی یەکەمی 2025، سیامەند مەولوود، سەرۆکی ئەنجوومەنی بازاڕی دراوی هەولێر بە تۆڕی میدیایی رووداوی راگەیاند: "بەپێی بڕیاری ئەنجوومەنی بازاڕ، بڕیاردراوە بە جێبەجێکردنی رێژەی نوێی دۆلاری شین و سپی لە کاتی گۆڕینەوەدا لە سبەی سێشەممەوە، سیستمەکە لە (50٪ شین و 50٪ سپی)ـەوە دەگۆڕێت بۆ (70٪ شین و 28٪ سپی و 2٪یش دۆلاری پەنجایی)."
بە گوتەی سیامەند مەولوود، بەپێی ئەم بڕیارە، لەمەودوا هەر کەسێک یان بازرگانێک بڕێک پارە لە بازاڕی دراوی هەولێر بکڕێت یان ئاڵوگۆڕی پێوە بکات لە هەر 10 هەزار دۆلارێک، 70٪ دۆلاری بە چاپی نوێ (شین) و 28٪ دۆلاری بە چاپی کۆن (سپی) پێدەدرێت، لە کاتێکدا پێشتر نیوە بە نیوە بوو.
لەبارەی 2٪ی دۆلاری پەنجایی سیامەند مەولوود گوتی:"لە هەر 10 هەزار دۆلارێکدا 200 دۆلاری پەنجایی وەردەگیرێت".
هۆکاری گۆڕانکارییەکە
سەبارەت بە هۆکاری دەرکردنی ئەم بڕیارە، سیامەند مەولوود دەڵێت: "نزیکەی 10 رۆژە ئەم سیستەمە (70 بە 30) لە بازاڕەکانی سلێمانی و دهۆک جێبەجێ دەکرێت، بەڵام لە هەولێر وەک خۆی مابووەوە. ئەم جیاوازییە وایکردبوو هەولێر زیان بکات و بڕێکی زۆر دۆلاری سپی لە بازاڕی هەولێر کەڵەکە ببێت و کۆببێتەوە."
سەرۆکی ئەنجوومەنی بازاڕی دراوی هەولێر ئاماژەی بەوەشکرد، بەهۆی ئەوەی نرخی حەواڵە بەرزدەبێتەوە و بۆ ئەوەی بازاڕی هەولێر تووشی کورتهێنان نەبێت، دوای وەرگرتنی رای کاسبکاران و خەڵکی بازاڕ، بڕیاردرا هەولێریش هاوشێوەی شارەکانی دیکەی لێبکرێتەوە.
سەرچاوەیەک لە وەزارەتی دارایی و بەرپرسێکی ئەمنیی ئاگادار بە تۆڕی میدیایی رووداویان راگەیاند، "لە بانکی ناوەندیش بە سیستەمی (70%ی شین، 28%ی سپی و 2%یش دۆلاری پەنجایی) کار دەکرێت، بەڵام هیچ نووسراوێکی فەرمی لەوبارەوە نییە، چونکە جگە لە ئەمریکا کەس ناتوانێت مامەڵەی دۆلار دیاری بکات، بەڵام وەکو نەریتێک لەوێش بەو سیستەمە کاری پێدەکرێت، بۆیە لە کوردستانیش بەو شێوەیە کار دەکرێت".
