رووداو دیجیتاڵ
سەرۆکی گەورەشارەوانیی بە قەییوم دانراو بۆ پارێزگای وان، تابلۆی داینگەی "پەپوولە"ی هێنایە خوارەوە کە بە زمانی کوردی بوو و لە شوێنی ئەو، تابلۆیەکی تورکی هەڵواسی.
تابلۆی داینگەکە کە لەسەری نووسرابوو "Perperok" (پەپوولە)، لابرا و لە شوێنی ئەو تابلۆی "دایەنگە و ناوەندی چاودێریی رۆژانە" (Kreş ve Gündüz Bakımevi) هەڵواسرا.
داینگەی پەپوولە، لە ساڵی 2015 لەلایەن گەورەشارەوانیی سەر بە هەدەپە- وە کرایەوە و وەک یەکەم داینگەی کوردی لە مێژووی پارێزگای واندا تۆمارکرا.
ساڵی 2016، قەییوم بەسەر شارەوانییەکە دانراو تابلۆی داینگەکەی هێنرایە خوارەوە و لە شوێنی ئەو تابلۆیەکی تورکی هەڵواسی.
دوای ئەوەی لە هەڵبژاردنی 2024دا دەم پارتی گەورەشارەوانیی وان-ی بەدەستهێنایەوە، تابلۆ کوردییەکە جارێکی دیکە هەڵواسرایەوە. کەچی ئەمجارەش قەییوم ، هەمان کاری چەندبارە کردەوە و تابلۆ کوردییەکەی هێنایە خوارەوە.
داینگەی پەپوولە جێگەی 90 منداڵی تێدا دەبێتەوە و ژووری دراما، سینەما، میوزیک، سەما، شەتڕەنج، کلینیک و یاریگەی منداڵانی تێدایە.
هەر پۆلێکی داینگەکە بۆ 18 منداڵ دیزاین کراوە و پلانی بۆ دانرابوو کە خزمەتگوزاری پێشکێشی منداڵانی تەمەن 0 بۆ 6 ساڵ بکات.
