رووداو دیجیتاڵ
قایمقامی قەزای پشدەر رایگەیاند، هەفتەیەکە بەهۆی بەفربارینەوە هاتووچۆ لە دەروازەی کێلێ وەستاوە، بڕیارە سبەی هاتووچۆی گەشتیاری ئاسایی ببێتەوە.
رۆژی دووشەممە، 5ـی کانوونی دووەمی 2026، بەکر بایز، قایمقامی قەزای پشدەر بە تۆڕی میدیایی رووداوی راگەیاند: "لە سنووری قەزای پشدەر لە پارێزگای سلێمانی، دەروازەی کێلێ بەهۆی بەفرێکی زۆرەوە هەم لە دیوی ئێمە و هەم لە دیوی ئێرانەوە 7 رۆژ بوو هاتووچۆی گەشتیاری و بازرگانی تێدا وەستاوە".
بە گوتەی بەکر بایز، رێگاکان لە بەفر پاککراونەتەوە، سبەی هاتووچۆی گەشتیاری ئاسایی دەبێتەوە. گوتیشی: "رۆژی دواتر هاتووچۆی بازرگانیش ئاسایی دەبێتەوە".
قایمقامی قەزای پشدەر باسی لەوەش کرد: "هەموو ئامادەکارییەک کراوە، سبەی کە گەشتیاران سەردانی دەروازەکەیان کرد، هاتووچۆ ئاسایی دەبێتەوە".
دەروازەی کێلێ؛ دەکەوێتە سنووری قەزای پشدەر لە ئیدارەی سەربەخۆی راپەڕین. لە نێوان سەردەشتی رۆژهەڵاتی کوردستان و قەڵادزێی باشووری کوردستانە.
