رووداو دیجیتاڵ
دیوانی وەقفی سوننیی عێراق ئەو دەنگۆیانە رەتدەکاتەوە کە گوایە هۆشدارییان داوەتە مزگەوتە کوردییەکانی کەرکووک و سەڵاحەدین سەبارەت بە کۆکردنەوەی هاوکاری و نزاکردن بۆ رۆژئاوای کوردستان. بەرپرسێکی وەقفەکەش لە کەرکووک دەڵێت، "هەر مزگەوتێک هاوکاری کۆبکاتەوە دەستخۆشی لێدەکەین."
ئەمڕۆ هەینی 23-01-2026، دیوانی وەقفی سوننیی عێراق لە روونکردنەوەیەکدا بڵاویکردەوە، ئەو هەواڵانەی باس لەوە دەکەن هۆشداری درابێتە پێشنوێژ و وتارخوێنی مزگەوتە کوردییەکانی پارێزگاکانی کەرکووک و سەڵاحەدین، "دوورن لە راستییەوە و هەڵبەستراون."
لە بەشێکی راگەیێندراوەکەدا هاتووە، "مافی یاسایی خۆمان دەپارێزین بۆ بەدواداچوونی ئەو لایەنانەی هەواڵی درۆ بڵاودەکەنەوە، چونکە دەبنە هۆی چەواشەکردنی رای گشتی و ناوزڕاندنی دامەزراوە ئایینی و فەرمییەکان."
سالم زەنگەنە، بەڕێوەبەری وەقفی سوننی کەرکووک بە تۆڕی میدیایی رووداوی راگەیاند، هیچ رێنماییەکیان بەدەست نەگەیشتووە بۆ رێگری لە نزاکردن بۆ رۆژئاوای کوردستان.
سالم زەنگەنە گوتی، "بە هیچ جۆرێک بە مامۆستا و مەلاکانی مزگەوتەکانمان نەگوتووە نزا نەکەن بۆ کوردانی رۆژئاوا؛ بە پێچەوانەوە هەمیشە نزای خێر و چاکەمان کردووە و نزای کۆتاییهاتنی نەهامەتی و شەڕمان کردووە بۆ براکانمان."
سەبارەت بە کۆکردنەوەی هاوکاریی ماددی بۆ ئاوارە و لێقەوماوانی رۆژئاوا، بەڕێوەبەری وەقفی سوننی کەرکووک جەختی لەوە کردەوە کە رێگری لە هیچ مزگەوتێک ناکەن و گوتی، "هەر مزگەوتێک سەرپشک کراوە ئەگەر کۆمەک و هاوکاری کۆبکەنەوە بۆ لێقەوماوان، ئێمە دەستخۆشییان لێدەکەین."
