رووداو دیجیتاڵ
هێزەکانی سووریای دیموکرات (هەسەدە) دەڵێت، شەڕڤانێکی بەهۆی ئەوەی لە گرتەیەکی ڤیدیۆییدا لە تەنیشت تەرمی چەند چەکدارێکی کوژراو وێنەی گرتووە، لە ریزەکانی دوورخستووەتەوە و دەیداتە دادگەی سەربازی.
لە راگەیێندراوێکدا ناوەندی راگەیاندنی هەسەدە دەڵێت، دوای بڵاوبوونەوەی گرتەیەکی ڤیدیۆیی یەکێک لە شەڕڤانەکانی لە سنووری گوندی خەڕووسی باشووری کۆبانێ لەکاتی بەرپەرچدانەوەی هێرشەکان، کە تێیدا لە تەنیشت تەرمی چەکدارە کوژراوەکان وێنەی گرتبوو، دەستبەجێ رێکاری یاساییان بەرامبەری گرتووەتەبەر.
لە راگەیێندراوەکەدا هاتووە، "ئەو شەڕڤانە بەهۆی پێشێلکردنی بەها ئاکاری و سەربازییەکان، دەستبەجێ لە ریزەکانی هێزەکانمان دەرکرا و رەوانەی دادگای سەربازی کراوە تاوەکو سزا بدرێت."
هەسەدە باس لەوە دەکات، "ئەوەی کراوە مامەڵەیەکی تاکەکەسییە و بە هیچ شێوەیەک گوزارشت لە بنەما ئەخلاقییەکانی هەسەدە ناکات، چونکە هێزەکانمان هەمیشە پابەندی پاراستنی شکۆی مرۆیی و رێزگرتنن لە شکۆی تەرمەکان، تەنانەت لەکاتی جەنگیشدا."
