یەکەم هەینیی رەمەزان لە مزگەوتێکی هەولێر؛ "کۆنترۆڵکردنی ئارەزووەکان"

د. بەشیر حەداد لە گوتارەکەیدا جەختی لە پرەنسیپەکانی "دانبەخۆداگرتن" کردەوە. رایگەیاند کە رەمەزان تەنیا مانگی دوورکەوتنەوە لە خواردن و خواردنەوە نییە، بەڵکو مەشقێکی گەورەیە بۆ زاڵبوون بەسەر نەفس و بەهێزکردنی ئیرادەی مرۆڤ لەبەردەم ئارەزووەکانیدا.

لە بەشێکی دیکەی گوتارەکەیدا، د. بەشیر حەداد هۆشداریی دا بە موسڵمانان لە مەترسیی بەفیڕۆدانی کاتە زێڕینەکانی ئەم مانگە و گوتی: "پێویستە موسڵمانان کاتەکانیان بە عیبادەت و نزیکبوونەوە لە خودا بڕازێننەوە، نەک کاتەکانی رەمەزان بە سۆشیاڵ میدیا و شتی بێسوود بکوژن".

ئاماژەی بەوەش کرد کە بەکارهێنانی لە رادەبەدەری تەکنەلۆژیا و تۆڕە کۆمەڵایەتییەکان، مرۆڤ لە ئامانجە راستەقینەکەی رۆژوو، کە "گەیشتنە بە تەقوا و ئارامیی دەروونی، دوور دەخاتەوە".

لە کۆتاییدا، داوای لە ئامادەبووان کرد کە ئەم مانگە بکەنە دەرفەتێک بۆ خۆگۆڕین و بایەخدانی زیاتر بە: "خوێندنەوەی قورئانی پیرۆز، پابەندبوون بە نوێژەکان، ئەنجامدانی کارە خێرخوازییەکان و یارمەتیدانی هەژاران".