رووداو دیجیتاڵ
یاریدەدەری سەرۆکی دەسەڵاتی دادوەریی ئێران بۆ کاروباری نێودەوڵەتی رایگەیاند، تاران داوای لە بەغدا کردووە 38 کەسی داواکراوی رادەست بکات کە لە هەرێمی کوردستان نیشتەجێن.
لە چوارچێوەی پرۆسەی دادگەییکردنی ئەندامانی باڵا و سەرکردەکانی رێکخراوی موجاهیدینی خەڵق کە لە تاران بەڕێوەدەچێت، کازم غەریب ئابادی، ئەمینداری لیژنەی مافەکانی مرۆڤ و یاریدەدەری سەرۆکی دەسەڵاتی دادوەری ئێران بۆ کاروباری نێودەوڵەتیی رایگەیاند، "تیرۆر یەکێکە لە تاوانە هەرە مەزنەکان کە لە رێگەی پاڵپشتیکردنی ژمارەیەک وڵات کە بانگەشەی مافی مرۆڤ دەکەن، ئەنجام دەدرێت".
کازم غەریب ئابادی، راشیگەیاند، "کۆماری ئیسلامی ئێران، یەکێکە لە گەورەترین قوربانییانی دەستی تیرۆر. بەهۆی تیرۆرەوە زیاتر لە 23 هەزار سڤیلی بێتاوان شەهید بوون. لەنێویاندا 17 هەزار بێتاوان بە دەستی رێکخراوی تیرۆریستی بەناو موجاهیدی خەڵق شەهید بوون".
ئابادی باسی لەوەشکرد، "ئێران لە رووی یاسایی و دادوەرییەوە مامەڵە لەگەڵ پرسی تیرۆر دەکات، بەڵام تیرۆریستان لە رێگەی کردەوە تیرۆریستییەکانیانەوە لەژێر پەردەی سیاسییەوە کار دەکەن و داوای ماف دەکەن و ئەرکی ئێمەیە نیازی خراپیان ئاشکرا بکەین. هەروەها بە یاسا لە هەر شوێنێکی جیهان بن داوایان بکەین و رادەستی دادگەیان بکەین بۆ سزادانیان".
راشیگەیاند، لە رێگەی حکومەتی عێراقەوە داوای رادەستکردنەوەی 38 داواکراویان کردووە کە وەک خۆی دەڵێت، "ئەندامانی رێکخراوی تیرۆریستی جوداخوازن و خۆیان بە نوێنەری گەلی کوردی دڵسۆز ناساندووە و لە هەرێمی کوردستاندا نیشتەجێن".
یاریدەدەری سەرۆکی دەسەڵاتی دادوەری ئێران بۆ کاروباری نێودەوڵەتیی ئاماژەی بەوەشکرد، بۆ ئەوەی وڵاتان هیچ بیانوو و پاساویان نەبێت لە رادەستکردنەوەی داواکراوەکان، دادگەی ئێران بڕیاری سزادانیان دەدات و بەمەش ئەم وڵاتانە ناچار دەکات، کە ئەگەر داواکراوەکان رادەستیش نەکەنەوە، دەریان بکەن.
لە مانگی ئاداری 2023دا بەئامادەبوونی محەممەد شیاع سوودانی، سەرۆکوەزیرانی عێراق، عەلی شەمخانی، ئەمینداری ئەنجوومەنی باڵای ئاسایشی نیشتمانی ئێران و قاسم ئەعرەجی، راوێژکاری ئاسایشی نیشتمانی عێراق واژۆیان لەسەر رێککەوتننامەی بەهێزکردنی ئاسایشی سنوورە هاوبەشەکان کرد. ئامانج لەم رێککەوتننامەیە، تۆکمەکردن و پاراستنی ئاسایشی ناوچە سنوورییەکانە لەگەڵ هەرێمی کوردستان کە وەک ئێران دەڵێت، "هێزە ئۆپۆزسیۆنەکانی کورد هەڕەشەن بۆ سەر ئاسایشی تاران".
