رووداو دیجیتاڵ
سزای لەسێدارەدانی بەندکراوێکی سیاسیی کوردی رۆژهەڵاتی کوردستان لەلایەن دیوانی باڵای دادوەریی ئێران پشتڕاستکرایەوە.
ئەمڕۆ (دووشەممە، 31-03-2025) لقی 9ـی دیوانی باڵای دادوەریی ئێران، سزای لەسێدارەدانی حەمید حوسێننەژاد حەیدەرانلوو، بەندکراوی سیاسیی کورد، خەڵکی گوندی سگریکی سەر بە شاری چاڵدێرانی پارێزگای ورمێی رۆژهەڵاتی کوردستانی پشتڕاستکردەوە.
بەگوێرەی راپۆرتی رێکخراوەکانی مافی مرۆڤ لە رۆژهەڵاتی کوردستان، 26ـی ئادار، حەمید حوسێننەژاد لە زیندانی ناوەندیی ورمێ، بە فەرمی لە پشتڕاستکردنەوەی سزای لەسێدارەدان ئاگادارکراوەتەوە.
پێشتر و لە حوزەیرانی 2024، حەمید حوسێننەژاد تانەی لە بڕیاری سەرەتایی دادگە دابوو و دۆسیەکەی بەمەبەستی تێهەڵچوونەوە رادەستی لقی 9ـی دیوانی باڵای دادوەریی ئێران کرا.
شوباتی هەمان ساڵ، ئەو بەندکراوە سیاسییە بە تۆمەتی ''چالاکیی چەکداری دژی دەسەڵاتی ئێران''، لەلایەن دادگەی شۆڕشی ورمێ، بڕیاری لەسێدارەدانی بۆ دەرچوو.
ئەو هاونیشتمانییە 13-04-2023، لە سنووری چاڵدێران لەلایەن هێزە ئەمنییەکانی ئێرانەوە دەستگیرکرا و دۆسیەکەی پەیوەست بە ''بەشداریی لە تێکهەڵچوونە چەکدارییەکانی پارتی کرێکارانی کوردستان (پەکەکە) لەگەڵ هێزە ئەمنییەکان'' خرایە ژێر لێکۆڵینەوە.
ئەوە لەکاتێکدایە؛ لە پڕۆسەی دادگاییکردنەکەیدا، حەمید حوسێننەژاد سەرجەم ئەو تۆمەتانەی رەتکردووەتەوە و رایگەیاندووە، کاتی تێکهەڵچوونە چەکدارییەکەی پەکەکە و هێزە ئەمنییەکان، لەگەڵ خێزانەکەی لە تورکیا بووە.
