رووداو دیجیتاڵ
ئەوەی لە سەرەتای ئەم ڤیدیۆیە دەیبینین، کەناراوی خان یونسی باشووری غەززەیە، عەبدولحەلیم سەتڵێکی پڕ لە کیسەڵی دەریایی راوکردووە، نەبوونی خواردن و برسێتیی زۆر، غەززەییەکانی ناچار کردووە کیسەڵ بخۆن.
عەبدولحەلیم قانان، دانیشتووی خان یونسە و لەبارەی نەبوونی خواردنەوە دەڵێت، "کە جەنگ دەستیپێکرد، خواردن کەمیکرد. ئێستا هیچ خواردنێک نییە، بۆیە گۆشتی کیسەڵ جێگرەوەی پڕۆتینە. هیچ گۆشتێک، مریشێک یان سەوزەیەک نییە."
دوای سەربڕین و لێکردنەوەی قاوغەکەی، گۆشتەکەی پارچەپارچە دەکرێت، بە ئارد و سرکە دەشۆردرێتەوە ئینجا لەگەڵ پیاز، بیبەر، تەماتە و بەهارات تێکەڵ دەکرێت و بۆ کوڵان ئامادە دەکرێت
ماجیدە قانان، دانیشتوویێکی دیکەی خان یونسە و لەبارەی گۆشتەکەوە دەڵێت، "بەسەر خێزانەکاندا دابەشی دەکەین، هەمووان دەیخۆن و بەشی دەکەن. ئەمە بۆ فرۆشتن نییە، راوی دەکەین و بەسەر ئەو کەسانە دابەشی دەکەین کە دەیانەوێت بیخۆن."
18 مانگە لە غەززە شەڕە، لە 02-03-2025ـەوە ئیسرائیل چوونە ژوورەوەی هەموو هاوکارییە مرۆییەکانی بۆ غەززە وەستاندووە.
لە 18ـی مانگی رابردووەوەش، دوای تەواوبوونی ئاگربەست، دەستی بە بۆردوومانکردنی کەرتەکە کردووەتەوە.
