رووداو دیجیتاڵ
گوتەبێژی فریاکەوتنی ئێران دەڵێت، لە 6 رۆژی رابردوودا هەورەبرووسکە، زریان و رەشەبا بوونەتە هۆی گیانلەدەستدانی 7 کەس و برینداربوونی 67 کەسی دیکە.
رۆژی شەممە 3ی ئایاری 2025 بابەک یەکتاپەرەست، گوتەبێژی فریاکەوتنی ئێران رایگەیاند، "لە یەکشەممەی رابردووەوە تاوەکو دوێنێ هەینی، لە 6 پارێزگای وڵات 7 کەس لە ئەنجامی هەورەبرووسکە، زریان و رەشەبای بەهێز گیانیان لەدەستداوە و 67 کەسیش بریندار بوون."
یەکتاپەرەست ئاماژەی بەوەش کرد، "4 کەس لەوانەی گیانیان لەدەستداوە بەهۆی با و زریانی بەهێز و کەوتنەوەخوارەوەی شتی قورس بەسەریاندا بووە؛ سیانەکەی دیکەش بەهۆی هەورەبرووسکەوە بووە."
بە گوتەی گوتەبێژی فریاکەوتنی ئێران، گیانلەدەستدان و برینداربوونی ئەو کەسانە لە پارێزگاکانی تاران، خۆراسانی باشوور، خۆراسانی رەزەوی، مازندەران، مەرکەزی و ئەلبورز بووە.
یەکتاپەرەست رایگەیاند، "زۆرترین بریندار لە تاران بووە و 53 کەس لەو پارێزگایە بەهۆی هەورەبرووسکە، با و زریانی بەهێز بریندار بوون؛ لە خۆراسانی باشوور 7 کەس، لە مازندەران 3 کەس، لە مەرکەزی 2 کەس، لە ئەلبورز کەسێک و لە خۆراسانی رەزەویش کەسێک بەهۆی ئەو رووداوە سرووشتیانەوە بریندار بوون."
کەشناسیی ئێران دەڵێت، لە رۆژانی رابردوودا خێرایی با لە هەندێک شاری ئەو وڵاتە زیاتر لە 120 کیلۆمەتر لە کاژێرێکدا بووە.
