رووداو دیجیتاڵ
کۆما جڤاکێن کوردستان (کەجەکە) لەبارەی هێرشەکانی ئیسرائیل بۆ سەر ئێران دەڵێت: ''شەڕ هیچ کاتێک کێشەکانی چارەسەر نەکردوون، بەڵکو زیانی گەورەی بە گەلان گەیاندووە''.
هاوسەرۆکایەتیی کۆنسەی بەڕێوەبەریی کەجەکە رۆژی هەینی، 13ی حوزەیرانی 2025 بڵاویکردەوە: ''دوێنێ نیوەشەو ئیسرائیل بەشێوەیەکی فراوان هێرشی کردە سەر ئێران. بەداخەوە ئەم هێرشە، شەڕەکەی 7ی ئۆکتۆبەری 2023ی قووڵتر کردەوە کە زیانی زۆری بە گەلان گەیاند و بووە مایەی ئازاری زیاتر''.
کەجەکە ئاماژەی بەوە دەکات: ''ئەو شەڕانەی وڵاتان لەپێناو بەدەستهێنانی هێز و هەژموون دەیانهێننەکایەوە، هیچ کاتێک کێشەکانی چارەسەر نەکردوون، بەڵکو زیانی گەورەیش بە گەلان گەیشتووە''.
کەجەکە پێیوایە ''بانگەوازەکەی 27 شوباتی رێبەر ئاپۆ، چارەسەری ئەم ئاستەنگە مێژووییە دەکات. باوەڕمان وایە، ئەو شێوازەی رێبەر ئاپۆ، بۆ گفتوگۆی دیموکراسی و سیاسەتی دیموکراسی خستوویەتیەڕوو، کێشەکان چارەسەر دەکات''.
کۆما جڤاکێن کوردستان ئاماژە بەوە دەکات: ''بانگی هەمووان دەکەین، بە رێگەی سیاسەتی دیموکراسی و گفتوگۆ کێشەکان چارەسەر بکەن، نەوەک بە شەڕ''.
بەرەبەیانیی رۆژی هەینی، ئیسرائیل هێرشێکی ئاسمانیی بەرفراوانی کردە سەر ئێران.
هێرشەکان دوای ئەوەش بەشێوەی جیاواز بەردەوام بوون.
شەوی هەینیش ئێران چەندین مووشەکی ئاراستەی ئیسرائیل کرد.
