رووداو دیجیتاڵ
لە تاران، خەڵک بۆ پڕکردنی دەبەکانیان و خواردنەوەی ئاو لە تانکییە گشتییەکان سەرەیان گرتووە. ئەمە دیمەنێکی نامۆی پایتەختێکە کە رووبەڕووی یەکێک لە خراپترین وشکەساڵییەکانی دەیان ساڵی رابردوو بووەتەوە.
بارانبارین لە ئێران گەیشتووەتە نزمترین ئاستی سەدە و بەنداوەکان نیمچە بەتاڵن.
ئێران ناچار بووە بیر لەوە بکاتەوە ناوبەناو، رۆژانە ئاو لەسەر 10 ملیۆن دانیشتووی تاران ببڕێت.
ماوەی چەندین مانگە نیوەی پارێزگاکانی ئێران یەک دڵۆپ بارانیان بەخۆوە نەبینیوە. پێنج بەنداوی سەرەکی کە ئاوی خواردنەوە بۆ تاران دابین دەکەن، ئێستا لە ئاستێکی مەترسیداردان و یەکێکیان بەتەواوی وشکی کردووە.
پرۆفیسۆر کاوە مەدەنی، بەڕێوەبەری پەیمانگەی زانکۆی نەتەوە یەکگرتووەکان بۆ ئاو، ژینگە و تەندروستی دەڵێت، "دۆخەکە زۆر مەترسیدارە. وڵات ئێستا لە شەشەمین ساڵی وشکەساڵیدایە. تاوەکو ئێستا، لە ئاسایی زۆر وشکتر بووە؛ هیچ بارانێک لە سەرانسەری وڵاتدا نەباریوە و ئەمەش بۆ ئێران شتێکی نوێیە."
لە مەشهەد، دووەم گەورەترین شاری وڵات، ئاستی ئاو لە بەنداوەکاندا بۆ خوار 3٪ دابەزیوە.
کاوە مەدەنی دەڵێت، قەیرانەکەی ئێران سەرچاوەکەی دەگەڕێتەوە بۆ چەندین ساڵ بەڕێوەبردنی خراپی ژینگەیی، نەک تەنیا وشکەساڵی.
ئەو پرۆفیسۆرە دەڵێت، "کێشەی بەڕێوەبردنی خراپ هەیە. کێشەیەکی لەم شێوەیە بە شەو و رۆژێک دروست نەبووە، بەڵکو بەرهەمی دەیان ساڵ پلاندانانی خراپ و نەبوونی دووربینییە."
مەسعود پزیشکیان، سەرۆککۆماری ئێران هوشداریی داوە، ئەگەر پێش زستان باران نەبارێت، تاران چۆڵ دەکرێت.
بەڵام مەدەنی دەڵێت، گواستنەوەی ملیۆنان کەس ئەستەمە.
