رووداو دیجیتاڵ
سەرۆککۆماری تورکیا، بە تەلەفۆن قسەی لەگەڵ سەرۆککۆماری ئێران کرد.
ئێوارەی ئەمڕۆ پێنجشەممە، 22ـی کانوونی دووەمی 2026، سەرۆکایەتیی فەرمانگەی پەیوەندییەکان لە سەرۆکایەتیی کۆماری تورکیا، راگەیێندراوێکی بڵاوکردەوە و رایگەیاند، رەجەب تەیب ئەردۆغان، بە تەلەفۆن قسەی لەگەڵ مەسعود پزیشکیان، سەرۆککۆماری ئێران کردووە.
وەک لە راگەیێندراوەکەدا هاتووە، لە دیدارەکەدا پەیوەندییە دووقۆڵییەکانی نێوان تورکیا و ئێران و بابەتە هەرێمییەکان تاوتوێ کراون.
لە دیدارەکەدا ئەردۆغان ئاماژەی بەوە کرد، لە نزیکەوە چاودێری ئەو رووداوانە دەکات كە لە ئێران دەگوزەرێن. رایگەیاندووە، تورکیا گرنگی بە ئارامی و سەقامگیریی ئێران دەدات و هیچ کاتێک بە ئەرێنی لە سیناریۆکانی دەستوەردانی دەرەکی بۆ سەر ئێران ناڕوانن.
سەرۆککۆماری تورکیا جەختی لەسەر ئەوە کردەوە کە چارەسەرکردنی کێشەکان و رێگریکردن لە هەڵکشانی گرژییەکان لە ناوچەکەدا، لە بەرژەوەندیی تورکیادایە.
