پێموایە بۆشاییەكی كوشندە هەیە و كەسانی رۆشنبیر و دەستەبژێری بیرمەند و جیهانبین و خەڵكانی زانا و دڵسۆزی نێو كایەی هزر و مەعریفە، وەك پێویست خۆیان بۆ تەرخان نەكردووە و پرسی ورووژاندنی ئەو گرێ گەورانەیان بەشێوەیەك ئاوەڵا نەكردووە، بۆ ئەوەی دایەلۆگێكی فراوانی سەرتاسەری لێ بكەوێتەوە و دواجار گشت پەیوەندیدارانی پرسەكە لەنێو كۆمەڵگە و خەڵک و رێكخراوەكان و میدیا هەتا دەگاتە دامەزراوەكانی حوكمڕانییش تێیدا بەشدار بن و هەمووان لە پرۆسەی گەلاڵەكردنی فۆرمێك لە كەشف و وێناكردن و ناسین و پێناسەكردن بەشدار بن، بەداخەوە خۆدزینەوە و بێباكی و بەرژەوەندخوازی گەیشتووەتە ئاستێك كە زۆر ئاسایی بێ بگوترێ؛ هەر چی روودەدا با رووبدا. كەڵەكەبوونی ئەو هەموو قەیران و پرسە قووڵە بەبێ دەست بۆ بردن و قسە لەسەركردن، دواجار تەقینەوەی گەورەی لێ دەكەوێتەوە و بەهۆیەوە هەرچی هەیە دادەڕووخێ.
بەداخەوە؛ رەگی ئەم دەمارساردی و بێمتمانەییە زۆر كۆنە و خۆ بەدوورگرتنی مرۆڤیش لە گوتنی قسەی هەق ئێمەی گەیاندووەتە رۆژگارێك هەمیشە مەرگەسات لەدوای مەرگەسات روومان تێ بكا، هەڵبەت ئەویش بەهۆی حاكمییەتی ئەو پەروەردە باو و سەقەتەی بە مرۆڤ دەڵێت؛ زمانت بگرە داماو با سەریەشەت تووش نەبێ، كۆمەڵگەی چی، با گڕی تێ بەربێ!!!.
كەس نییە نەزانێ كە هەتا گۆی زەوی هەیە و هەتا ژیان مابێ، هەموو ئەو نەتەوە و ئایین و پێكهاتە جیاوازانەی لە سەر خاكی كوردستان هەن؛ هەر بە تەك یەكەوە دەمێننەوە و دەژین، شەڕ و ئاشووب رووبەری ئەو جوگرافیایە پارچە ناكەن و نابێ بە چەندین كیشوەر و پارچەی لەیەكترازاو، موسڵمان و ئێزدی و كاكەیی و كریستیان رەگی هەموویان لەم خاكەدا قووڵ رۆچووە و هەتا هەتاش بەیەكەوە دەمێننەوە، ئەوە چ رقێكی بە جوانگۆیی (موجامەلە) داپۆشراوە و ناوە ناوە وەك ئەژدیها سەر دەردێنێ و كاسە و كەوچكی كۆمەڵگەمان پڕ لە خۆڵ دەكا؟!
بەر لە هەر كەسێك من گلەیی لەخۆم دەكەم، كە منیش وەك هەر تاكێك بەهۆی ئەو پەروەردە باوەی كۆمەڵگە، وەكو پێویست لە ئاست مرۆڤبوونی راستەقینە و ئەرك و بەرپرسیارێتیی وڵات و كۆمەڵگەی خۆم نەبووم و بەرگرییم لە راستگۆیی نەكردووە و بۆ بەرژەوەندیی گشتی تێنەكۆشاوم و مافی بوونی ئەوانی دیم لەسەر خۆم بەجێنەگەیاندووە، زۆر بەداخەوە لەسەر ئاستی میللی و فەرمی (ئایینی و سیاسی و رۆشنبیری) و لەسەر ئاستی تاك و كۆمەڵگەش؛ خۆ دزینەوە و كەمتەرخەمییەكی گەورە هەیە، هەمیشە كێشەكان دەستیان بۆ نابردرێ و بە پاساوی جیاجیا دوادەخرێن، هەمیشە برینەكان بە بێ پاككردنەوە و تافیلكردن دەپێچرێنەوە، دواتریش دەرد و وەرەم و دومەڵەكان پێماندا دەتەقنەوە، وەك چۆن بەردەوام دەبینین چ هەژانێكی گەورە بە هەناوی كۆمەڵگە دەكەوێ لەگەڵ هەر قسە و لێدوان و دەمكردنەوەیەك، هەموو چەقۆكان سەرلەنوێ تیژ دەكرێنەوە و جارێكی دی زێرابەكانی رق و كینە گشت كۆڵانەكانی وڵات بۆنڕێژ دەكەن.
هەزاران ساڵە ئێزدی لەم كوردستانە وەكو داربەڕوو بەناو دەمارەكانی شاخدا رۆچووە و هەیە، سەتان ساڵە موسڵمانێتی گەیشتووەتە ئەم كوردستانە و هەیە و بووەتە بەشێك لە بوون و كولتووری كۆمەڵگە، بەهەمان شێوە كریستیان و كاكەییش، هەمووان بەیەكەوە تابلۆی رەنگینی چیرۆكی پێكەوەژیان لە كوردستان دەنەخشێنن، ئەگەر رێز لە یەكتر و جیاوازییەكانی یەكتر نەگرین، ئەوسا ئەو پێكەوەژیانەمان لێ دەبێ بە پێكەوە(زیان)، ناكرێ ئێمە كە چەندین ساڵە كولتوورێكی پێكەوەژیان كۆماندەكاتەوە؛ نەبووبێتە هۆی هێنانەئارای فۆرمێكی هاوتای پێكەوەژیان، ئەوە چ پێكەوەژیانێكە بەرگەی بچووكترین ختووكە نەگرێ، لەگەڵ هەر قسەیەك (كە بێگومان پاشخان و پاساوی خۆی هەیە) دەستمان بۆ میلی چەك بڕوا و لە پڕ هەموو چراكانی یەكتربینین خامۆش بكەین، دواجاریش یەكترقبووڵكردن و لێبووردەیی بە نرخی (من براوەم و تۆ دۆڕاو) بەیەكتری بفرۆشین و كۆنووسی پەشیمانبوونەوە و زەلیلی بە یەكتری واژۆ بكەین!!!.
بەر لە چەند ساڵێك؛ هاوڕێیەك پێی گوتم 'حەز دەكەم لەگەڵمان لەو كۆڕبەندە بەشدار بیت، كە بەتەماین بۆ پێكەوەژیانی ئایینە جیاوازەكان لە فڵانە شوێن سازی بكەین'، (لەو شوێنە موسوڵمان و كرستیان و ئێزدی بەیەكەوە دەژین)، وەڵامی من ئەوە بوو كە ئەگەر بێم لەوانەیە بە جۆرێك قسە بكەم لەگەڵ ئەو كەشوهەوا باوەی ئێستا نەگونجێ، كە بەداخەوە هەموان لە خوڵقاندنی ئەو كەشەدا بەشدارن و كۆمەڵگەش بەهۆیەوە باجەكە دەدات، رۆشنبیریش (ئەگەر هەبن)، بێگومان تاك و تەرا هەن، تا حەددێكی زۆر خزاونەتە چاڵەكەوە، ئەو شاعیر و نووسەر و رۆشنبیرانەش ئەگەر لەملاو و لەولا شتێكی جیاواز بڵێن و بڵاوبكەنەوە، ئەوە یەكسەر بەر غەزەبی كۆمەڵگە و ناوەندی سیاسی و ئایینی دەكەون، لەوەش مەترسیدارتر بەر فەتوای كۆمەڵایەتی و سیاسی و ئایینی دەكەون. ئەوە لە دەرەنجامی غیابی فكر و داخستنی دەرگەی دایەلۆگە لەنێوان كایەكانی كۆمەڵگە، داخران و شاردنەوە و داپۆشین و دواخستن هەرگیز نامانگەیێنێتە ئەو شوێنەی هەمووان یەكسانی ئەوانی دی ببینن، هێشتنەوەی دۆخەكە بە هەڵواسراوی و دەستنەبردن تەنانەت بۆ راستییە مێژووییەكانیش بێجگە لە پرسە هەستیارەكانی خودی ئایین، كە دەیان ساڵە وڵاتانی عەرەبی و رۆشنبیرانی عەرەب دەستیان بۆ بردووە و بە جورئەت و میتۆدی زانستی قسەیان لەبارەوە كردەوە و بەردەوامن، تازە بەتازە رۆشنبیری كورد و تاكی كورد ترسی لێ نیشتووە باسی جیاوازییە فقهییەكانی نێوان دوو مەزهەب بكات.
كێشەكە زۆر لەوە گەورەترە و ئەگەر هەر بەم شێوەیە بمێنینەوە، بەیانیمان هەرگیز لە ئەمڕۆمان باشتر نابێ، ئەو پێكەوەژیانەش كە پێوەی دەنازین هەتا سەر فریامان ناكەوێ و لەگەڵ دیارنەمانی شوان و گۆچان، یەكسەر گەلەگورگی دانوساوی ناخمان دەگاتە ناو مێگەلی تۆقیوی بەستەزمان. وەڵامی من بۆ ئەو هاوڕێیەم ئەوە بوو كە ناكرێ تۆ باس لە ستایش و شكۆداركردنی پێكەوەژیانی جیاوازییەكان بكەی لە كاتێكدا سایكۆلۆژیای یەكتر قبووڵكردن و سایكۆلۆژیای شەرعیەتدان بە جیاوازی ئامادە نەبێ، هەر تەنێكی جیاواز ئەگەر لە ناخەوە بەرامبەرەكەی پەسەند نەكا و مانەوەی خۆی لەگەڵیدا بە ناچاری ببینێ، ئەوە دۆخەكە هەمیشە لەبەردەم هەڕەشە و ئەگەری تەقینەوەدایە، هیچ رێگایەكی دی نییە بێجگە لە دایەلۆگێكی كراوە و بێ پەردە، كە راشكاوانە و بە روئیایەكی زانستییانەی دوور لە رق و سووكایەتی ئەبدەیتی ئەو دۆخە كولتوورییە كۆمەڵایەتییە مێژووییە ئایینییە بكرێ و رێز لە هەمووان بگیرێ، بەڵام چیتر خەڵكانێك بەناوی رەسەنایەتی و پیرۆزی و بۆ پاراستنی بەرژەوەندیی تەسكی خۆیان، راستییەكان پەردەپۆش نەكەن و لەئێستا و ئاییندەش نەبنە هۆی ئازاردانی كۆمەڵگە.
ئێمە ئەو پرسیارەمان لەخۆمان نەكردووە، بۆچی دەبێ ئێزدییەكان و كریستیان و كاكەییەكان و ئایینەكانی دیکە هەمیشە ترسێكی شاراوەیان لە ئیسلام و موسڵمانان هەبێ؟!، یان بۆچی دەبێ موسڵمانان هەمیشە ئایین و پەیڕەوانی ئایینەكانی دی وەكو بوون و بوونەوەری نامۆ و ناهەق و زیادە و لادەر و بێ چارەنووسی باش لەو دنیا ببینن؟! ئایا ئەوە دۆخێكی باش و تەندروستە؟ ئایا ئەوە پێی دەگوترێ پێكەوەژیان؟! من باش و تۆ نەفرەتلێكراو، من پەسند و تۆ قێزەون، پۆلێنكردنی جیاوازییەكان بۆ رەش و سپی و پیس و پۆخڵ هەرگیز نامانگەیێنێتە ئەو خاڵە هاوبەشەی كۆبوونەوە لەناو یەك بازنەی جیهانبینی و شەرعیەتدان بە بوونی جیاواز و حورمەتی ئەوانی دی.
ئەو رەوشەی دوایی كوردستان بەخۆیەوە بینی بەهۆی رستییەكەوە بوو كە (قاسم شەشۆ) لە دەیەمین ساڵڕۆژی جینۆسایدی ئێزدییەكان لە شەنگال كردی، ناوبراو هەرچیەكی گوتبێ؛ هۆكارەكەی بۆ تاوان و رەفتاری قێزەونی تیرۆریستانی دەوڵەتی ئیسلامی (داعش) و بێدەنگبوونی موسڵمانان دەرهەق بەو تاوانە دەگەڕێتەوە، كە دەڵێم بێدەنگبوونی موسڵمانان، مەبەستم ئەوەیە كە (لەسەر ئاستی فەرمی و ئایینی) بە درێژایی شەڕی بەرگریی پێشمەرگە و گەلی كوردستان دژ بە تیرۆریستانی دەوڵەتی ئیسلامی (داعش) تەنانەت یەك حزب و لایەنی ئیسلامی و یەك گوتارخوێنی موسڵمان بە دەمیاندا نەهات بڵێن دەوڵەتی ئیسلامی (داعش) لە دین دەرچووە و (كافرە)، ئاخر ئەوان ئێستاشی لەگەڵدا بێ، كەسیان داعشیان پێ كافر نییە.
بەر لە چەند رۆژێك هەر بەبۆنەی دەیەمین ساڵڕۆژی جینۆسایدی ئێزدییەكان، وتاری نووسەری ئیسلامی (ئەبوبەكر كاروانی)م خوێندەوە، كە لە ناوونیشان و ناوەڕۆكەکەیدا دەڵێ؛ جینۆسایدی دژ بە ئێزدییەكان (سووكایەتییەكی گەورەیە بە ئیسلام و بەها باڵاكانی)، من دەپرسم؛ ئەوە كێیە ئەو سوكایەتییە گەورەی بە ئیسلام و بەها باڵاكانی كردووە؟ بێگومان هەموومان وەڵامەكە دەزانین كە دەوڵەتی ئیسلامی (داعش) ئەو سووكایەتییە گەورەیەی بە ئیسلام كردووە، لەگەڵ رێزم بۆ نووسەر، مەبەستم لێرە خوێندنەوە نییە بۆ وتاری بەڕێزیان، بەڵام نووسینی كەسێكی بە هزر و ئنتیما ئیسلامی حەتمەن جیاوازە لەگەڵ نووسەرێكی دی، كە ئیسلامی نەبێ، لەبەر ئەوەی نووسەری ئیسلامی لە سۆنگەی عەقیدەی ئایینییەوە بیردەكاتەوە و دەنووسێ و هەر شتێك لەگەڵ پەیامی ئایینەكەیدا یەكنەگرێتەوە خۆی لێ بەدووردەگرێ. ئەو دەڵێ كە داعش جینۆسایدی دژ بە (هاووڵاتیی بێتاوانی یەزیدی) ئەنجامداوە، (بەڵام ئایا لە دیدی فیقهی و شەرعیی ئەوانەی جینۆسایدیان دژ بە ئێزدییەكان ئەنجامدا؛ ئایا راستە ئێزدییەكان هاووڵاتی بێتاوانن؟! كەواتە داعش بە چ پاساوێكی شەرعی ئەو قەتلوعامەی كرد؟)، لە كوشتنی هەزاران مرۆڤ و بەكۆیلەكردنی هەزارانی دیکە تەنها و تەنها لە سۆنگەی جیاوازیی ئایینی و بێ ئەوەی هیچ تاوانێكیان ئەنجام دابێت، بە تایبەتیش كچانی ئێزدی، كڕین و فرۆشتن پێوەكردنیان بەناوی سەبایاوە، (لێرەدا تێنەگەیشتم! ئەو كچ و ژنانەی كڕین و فرۆشتنیان پێوەكراوە بە ناوی سەبایاوە؟ سەبیكردن بووە یان بەناوی سەبایاوە بووە؟) یەعنی ئەگەر كڕین و فرۆشتنەكە بەناوی سەبایاوە نەبووبێ مەعنایەكی دیكەی هەیە؟!، یان سەبایا شتێكە كە هەیە و بنەما شەرعییەكانی جیاوازە لەگەڵ ئەو كڕین و فرۆشتنەی كە داعش كردی؟.
پێموایە ئەوەی داعش كردی شتێك نەبوو بە ناوی سەبایاوە كرابێ؛ بەڵكو خودی سەبی كردن بووە، كردنی شتێك بەناوی شتێكی دی، یاخود پێكچواندن لەنێوان دوو دۆخدا دەكرێ، ئەو كاتەی دووەم لاسایی یەكەم دەكاتەوە و دەیەوێ دەقاودەق دووبارەی بكاتەوە، دەكرێ تابلۆی مۆنالیزا لەلایەن شێوەكارێكەوە دووبارە دروست بكرێتەوە، بەڵام لە پرسی فیقهی و عەقیدەیی و پێوەستبوونی ئایینیەوە؛ پەرستش و بەجێگەیاندنی ئەركە ئایینیەكان دەبێ دەقاودەق هاوتای بنەما شەرعییەكان بن و بەناوی ئەوانەوە نەبن، بەڵكو دەبێ رێك خۆیان بن بەبێ زیاد و كەم، چونكە ئەگەر بڵێین داعش بەناوی سەبایاوە كڕین و فرۆشتنی بە كچ و ژنانی ئێزدییەوە كردووە، ئەوە دەبێتە جۆرێك لە رەواییدان بەو بەسەبایاكردنەی لە مێژووی ئیسلامدا هەبووە و لەوانەیە ئەوەی داعش كردی لەچاو ئەوەی جاران هەبووە هاوشان بووە یانیش سەرڕێژ و زیاتریش بووە، نووسەر ئەو تاوانەی دژ بە كچ و ژنانی ئێزدی وەك (دەستدرێژیكردنی نائەخلاقیانە و نامرۆڤانە) و زادەی (ئایدۆلۆژیایەكی خوێناوی) وەسف دەكا و دەڵێ ئەو تاوانە (لەژێر پەردە و درووشمی شەریعەتدا ئەنجام دراوە!! ئەوەش وایكردووە پێش هەرشتێك سووكایەتی بێت بە ئیسلام و بەها بەرزەكانی و گیانە عەدالەتخوازەكەی و مێژووی پێكەوەژیانی ئایین و مەزهەب و قوتابخانە جیاوازەكان لە مێژووی شارستانێتیی ئیسلامی و تایپی ئایینداری و واقیعی كوردەواریدا). هەتا دەگاتە ئەو شوێنەی لە كۆتاییدا رووی دەمی لە ئیسلامییەكان و ناوەندە ئایینییە كوردستانییەكە دەكا لەم جۆرە یادكردنەوانە لە ریزی هەرەپێشەوەدا جێگە بگرن، (نادیار نەبن) و بەدەنگی دلێریش قسەی خۆیان هەبێت بەڵكو خۆشیان كۆنفرانسی لەسەربگرن.
دەپرسین بۆ دەبێ ئیسلامییەكان لە ریزی پێشەوەی ئەو یادكردنەوانە نەبن؟ هۆكار چییە ئیسلامییەكان (نادیارن) و (قسەی خۆیان نییە)؟ بۆ بێدەنگن و (كۆنفرانس) لەسەر شەنگال و ئێزدییەكان ناگرن، كە نووسەر وەك پێشنیازێكی رەخنەئامێز ئاراستەی ئیسلامییەكانی دەكا؟! ئەی بۆچی ئیسلامییەكان بۆ غەززە و چیچان و كۆسۆڤۆ شین و واوەیلا دەكەن؟، لێرەدا پێمخۆشە بڵێم كە جینۆسایدی ئێزدییەكان بە تەنیا تاوانێك نییە دەستەواژەی سادەی بۆ بەكاربێنین و بیكەینە زادەی (ئایدۆلۆژیایەكی خوێناوی)، بەبێ ئەوەی دەست لەسەر برینەكان دابنێین!!، چونكە ناوهێنانی ئایدۆلۆژیای خوێناوی مەبەست و مانای زۆر هەڵدەگرێ (زانیمان ئەوەی رژێمی بەعس لە عێراق كچان و ژنانی كوردستانی بە هەمان شێوەی داعش رفاند و كردنی بە كەنیزەك و فرۆشتنی بە وڵاتانی عەرەبی ئیسلامی لەژێر ناوی سوورەتی ئەنفال، بەڵام بەعس دەستەواژەی سەبایای بەكارنەهێنا، كەچی داعش وەك نووسەر دەڵێ لە ژێر پەردە و دروشمی شەریعەتدا ئەو تاوانەی بەناوی سەبایاوە كرد)، داعش لە نەزانی و بێئاگایی دەستەواژەی سەبایای هەڵنەبژاردووە بۆ ئەوەی ئێمە بێین كردەوەكانی ببەستینەوە بە پاشماوەكانی ناسیونالیزمی عەرەبی بەرجەستە لە بەعس وەك نووسەر باسی كردووە و داعشی یەكانگیر كردووە لەگەڵ عەقڵی دواكەوتووی خێڵی عەرەبی و دەوڵەتی داگیركار و ستەمكار!، هەر بەڕاستی ئەوە دەبێتە پاساوهێنانەوە بۆ تاوانەكانی داعش و ریزكردن و دانانی ئەو هێلكە دەگمەن و جوانەی داعش لەناو سەبەتە و كولانەی (تایپی تووندڕەوی سەلەفییەتی جیهادی و ناسیونالیزمی بەعسی عەرەبی و عەقڵی دواكەوتووی خێڵی عەرەبی و دەوڵەتی داگیركار و ستەمكار؛ خۆی لە خۆیدا دەبێتە سادەكردنی تێكڕای پرسەكە و بێتاوانبوون و پەرێزپاكیی ئەو (ئایدیۆلۆژیا خوێناوییەی داعش) كە نووسەر ئاماژەی پێداوە، ئەگەر ئەو قسانە ئاساییە ئایدیۆلۆژیای پشت تاوانەكانی داعش بە رەفتارەكانی ناسیونالیزمی عەرەبی و عەقڵی دواكەوتووی خێڵی عەرەبی بچوێندرێ، ئەوە دەبێ نووسەرانی سۆماڵیش تاوانەكانی (بۆكۆ حەرام) بە سیستێمی خێڵەكی و دكتاتۆریی ئەو وڵاتە بەراورد بكەن و بڵێن ئەو كچ و ئافرەتانەی لە سۆماڵ كرانە سەبایا پەیوەندی بە هیچ بنەمایەكی شەرعییەوە نییە، بەڵکو لەژێر پەردە و درووشمی شەریعەتدا ئەنجامدراون!.
باشە ئەگەر ئەوەی دەوڵەتی ئیسلامی (داعش) دژ بە ئێزدییەكان كردی سووكایەتی گەورە بێ دەرهەق بە ئیسلام و بەها باڵاكانی، ئەی بۆچی لەپای ئەو سووكایەتییە كەس داعشی تەكفیر نەكرد؟! چونكە لەو ساڵانەی دواییدا لە كوردستان دەق و نووسینی چەندین شاعیر و نووسەریش وەك سووكایەتیكردن بە ئیسلام و بەها باڵاكانی لێكدرایەوە و لەلایەن زانایانی ئایینی و بە ئاشكرا لەسەر مینبەری مزگەوتەكان ئەو نووسەر و شاعیرانە تەكفیر كران و فەتوایان بۆ دەركرا و خەڵك هاندرا لەدژیان، شاعیرێك لەسەر دەقێكی شیعری تەكفیر دەكرێ بەبێ ئەوەی مێشوولەیەكی كوشتبێ، كەچی دەوڵەتی ئیسلامی (داعش) زیاتر لە پێنج هەزار كەس لە شەنگال دەكوژێ و شەش هەزار و 417 لە كچ و ئافرەت و نێرینە دەڕفێنێ و كچان و ژنان دەكا بە سەبایا و كۆیلەی سێكسی و كوژراوان لە (29) گۆڕی بەكۆمەڵدا زیندەبەچاڵ و گولـلەباران دەكا و (68) پەرستگای ئێزدییەكان خاپوور دەكا و دێهات و ئاوەدانییان لێ وێران دەكا و لە ئەنجامدا مەرگەساتێكی قووڵی هەتاهەتایی بۆ ئەو پێكهاتە ئایینییە داماو و بەشمەینەتە دەنێتەوە، كە لە ئەنجامدا هەتا ئێستا (120000) كەسی ئێزدی زێد و وڵاتی خۆیان بەجێهێشتووە و پەڕاگەندەی هەندەران بوونە و هەتا با لەو كونەوە بێ قەت ناوێرن بگەڕێنەوە.
بەڵێ دەوڵەتی ئیسلامی (داعش) ئەو هەموو مرۆڤە دەكوژێ و (دەستدرێژیی نائەخلاقی و نامرۆڤانە) دەكا و (ئایدیۆلۆژیای خوێناوی) پەیڕەو دەكا و (سووكایەتی بە ئیسلام و بەها باڵاكانی ئیسلام دەكا)! كەچی یەك كەس لەو زانا و دانایانەی ئایینی پیرۆزی ئیسلام داعش تەكفیر ناكەن!، راستە گوتیان داعش نوێنەرایەتیی ئیسلام ناكا، راستە گوتیان ئیسلام زۆر جیاوازە لە داعش و داعش تەفسیر و تەئویلی جیاواز بۆ دەقی قورئان و سوننەت دەكا، بەڵام هەرگیز نەیانگوت داعش كافرە، بە درێژایی شەڕی دژ بە تیرۆریستانی دەوڵەتی ئیسلامی (داعش) ژمارەی قوربانیانی هێزی پێشمەرگە بۆ بەرگریكردن لە خاكی كوردستان بریتی بوو لە (1810) شەهید و (10369) بریندار، كەچی لە رۆژانی ئەو شەڕە نەگریسەدا بینیمان چەندین كەسی ئیسلامی (گوایە بە تووندڕەو ناوەزەد دەكرێن) بەناوی ئایین و زانای ئایینی هەرگیز ئامادە نەبوون قوربانیدان و گیانفیدایی پێشمەرگە بە شەهیدبوون وەسف بكەن، سەیرە دەمیان نەیگرت بە پێشمەرگە بڵێن شەهید، بەڵام نكووڵی لەوەش ناكرێ كە مەلا و زانای كوردپەروەر و نیشتیمانپەروەریش هەبوون شان بەشانی پێشمەرگە دژ بەو تاریكپەرستانەی داعش جەنگان و ناوی خۆیان لە تۆماری سەروەریدا نەخشاند.
بەر لەوەی ئەم رستەیە بنووسم؛ با رێز و حورمەت و پیرۆزیی و گەورەیی بۆ گشت ئایین و عەقیدەی هەمووان بنوێنین، ئینجا بڵێم برایان خوشكان ئازیزان هیچ شتێك وەك حورمەتی ماڵ و منداڵ و خێزان و نامووس و ئابڕوو نییە، مرۆڤ پارچەیەك خوێن و گۆشت و هەست و سۆزە، بێگومان ئەو قسەی (قاسم شەشۆ) كردی هەستی موسڵمانانی رووشاند، بەڵام هەر لەڕووی هەست و سۆزەوە، با هەر یەكێك لە ئێمە خۆی لە شوێنی كەسێكی ئێزدی دابنێ، كە دایك و خوشك و كچ و نامووسی بەو شێوەیە ئەتككرا بێ، باوك و برا و كوڕ و مام و خاڵ و ئامۆزا و خاڵۆزا و پوورزا و دۆست و كەس و گشت قەوم و قیلەی بەو شێوە دڕندانەیە كوژرا بن، ئەو دوژمنەشی كە ناوی داعشە و ئەو تاوانەی (لەژێر پەردە و درووشمی شەریعەتدا) ئەنجامدابێ، هاوكات زانایانی ئەمڕۆی ئەو شەریعەتەش كە رەفتارەكانی ئەو داعشە بە پێچەوانەی بنەما ئایینییەكانی ئیسلام بزانن و وەكو سووكایەتیكردنیش بەو ئایینەی خۆیان وەسفی بكەن و هەرگیز ئامادەش نەبن بەو داعشە بڵێن كافر؛ دەبێ هەستی ئەو ئێزدییە چۆن بێ و لە ساڵڕۆژی برین و ئازارەكانی خۆیدا چاوەڕوانی چی لێ بكەین؟!
من ناڵێم بێڕێزیكردن رەفتارێكی پەسەند و تەندروستە، نەخێر هەرگیز نابێ مرۆڤ خراپە بە خراپە وەڵام بداتەوە، بەڵام ئێزدییەك برینەكەی ئەوەندە قووڵ بێ و هاوارەكەی ئەوەندە تاڵ و نەهامەتییەكەی ئەوەندە بێكۆتا بێ، ئایا رەوایە ئەو هەموو مینبەر و تیكتۆكچی و سۆشیاڵچی و بڵندگۆیەی بۆ بخرێتە گەڕ؟! من سەیری زۆربەی ئەو پۆست و ڤیدیۆ و كۆمێنتانەم كردووە لەم چەند رۆژانەی رابردوو بڵاوكرانەوە، زۆربەی هەرە زۆری مەلا و زانایانی ئایینی ئیسلام لە نەرم و میانڕەوەوە هەتا دەگاتە بانگخوازی تووندڕەو و سەلەفی جیهادی و موسڵمانی سادە و هاكەزایی و هەتا كار و نۆرە گەیشتە میراتگرانی داعش و تیرۆریستان و شانە نووستووەكانی خوێن و تۆقاندن، هەر هەموویان لە یەك خاڵدا هاوبەش بوون لەسەر ئەوەی دەبێ ئەو كەسە (زمانی ببڕدرێ) كە بێڕێزی بەرامبەر ئیسلام و پێغەمبەری ئیسلام كردووە. راستە هەندێكیان باسیان لە سكاڵای یاسایی و بەرزكردنەوەی داوای یاسایی لە دادگاكان كردووە، بەڵام گشت گوتار و قسە و كۆمێنت و هەڵوێستەكان پڕاوپڕ بوون لە گوتاری رقلێبوونەوە و بڵاوكردنەوەی تووڕەیی و هاندان و ورووژاندانی رای گشتی موسڵمانان و بەتایبەتی جەماوەری ئیسلامی بە مەبەستی تۆڵەسەندنەوە و هەڕەشەكردنی راستەوخۆ. باشە هاتنەئارای دۆخێكی لەمجۆرە كە ئاژاوەیێكی سەرتاسەری لێ بكەوێتەوە و كۆمەڵگە بخاتە نێو شەڕێكی مەترسیداری خوێناوییەوە، دەبێ ئەركی رۆشنبیران و بیرمەندان و كەسانی عاقڵی خاوەن بیر و مەعریفەت چی بێ؟ یان دامەزراوە سەروەرییەكانی وڵات و حوكمڕانی دەبێ بێجگە لە بڵاوكردنەوەی بەیاننامە و لێدوان چ هەنگاوێك بنێن و بیر لە كامە میكانیزم و رێگەچارە بكەنەوە بۆ ئەوەی لە داهاتوودا رێ لە قەیرانی هاوشێوە بگرن، بۆ نموونە دەڵێم؛ ئەو ساڵە بیرم نایە چ ساڵێك بوو، (هەڵە نەبم) بەهۆی فەتوای زانایەكی ئایینی موسوڵمان، كە لەسەر مینبەر فەتوای دژ بە شاعیرێك دابوو، ئەوسا جەنابی (سەرۆك مەسعود بارزانی) كە سەرۆكی هەرێمی كوردستان بوو، سەرۆكایەتیی هەرێم و دەزگا پەیوەندیدارەكانی راسپارد بۆ ئەوەی كۆڕبەندێكی تایبەت بەو پرسە ساز بكەن، ئەوەبوو رۆشنبیران و نووسەران و زانایانی ئایینی ئیسلام و كەسانی پسپۆر لە بواری فكر و دەستەبژێرانی كۆمەڵگەی كوردستان لە هەولێر كۆبوونەوە و پرسی ئازادی رادەربڕین و رێزگرتنی جیاوازییەكان و قبووڵكردنی ئەوانی دی تاوتوێ كران و دواتر كۆمەڵێك راسپاردە و بەلاغی كۆتایی ئاراستەی ناوەند و لایەنە فەرمییەكانی كوردستان كران.
لێرەدا بەجێی دەبینم هەمان ئەو بانگ و داوایە ئاراستەی سەرۆكایەتیی هەرێمی كوردستان و كەسی بەڕێز (نێچیرڤان بارزانی) سەرۆكی هەرێمی كوردستان بكەم و بڵێم، لەپێناوی ئەوەی هەمیشە كێشەكانی دوێنێ و پار و پێرار دووبارە نەبنەوە و هەمان گرێ و ئاڵۆزییەكان رێگری لە بەرەوپێشەوەچوونی كۆمەڵگەی كوردستان نەكەن، پێشنیاز دەكەم چ كۆڕبەند یان دیدارێكی تایبەتی هزری بۆ تاوتوێكردنی قەیرانی لەمجۆرەی ئەم دواییە هاتەپێش بە چاودێری و سەرپەرشتیی راستەوخۆی بەڕێزتان ساز بكرێ (کۆسپەکانی بەردەم پێکەوەژیان و گوتاری ئایینی و رێزگرتنی جیاوازییەكان) هەڵبەت ئەوەی دوای قسە و لێدوانی (قاسم شەشۆ) و ئەو وەڵام و وەڵامكاریانەی بەدوایدا هاتن و جۆرێك لە پشێوی و نائارامی كۆمەڵایەتی لێكەوتەوە.
لە كۆتاییدا دەڵێم، ناكرێ ئەم كۆمەڵگەی ئێمە هەتا هەتا مەحكووم بێ بەوەی باجی ئەو دۆخە پاراونەكراوەی كایەی ئایینی و هزری و كولتووری بدات و لەناكاو و لەپڕ هەر جارەی بەهۆی قسەیەك لێرە و لەوێ و هەر جارە و بەهۆی دەقێكی شیعری یان رەفتاری كەسێكی سەر بە پەیڕەوانی ئایین و مەزهەب و عەقیدەیەك، سەرتاپای كۆمەڵگە بگاتە لێواری ئاگردانێك خوانەخواستە هەمووان بسووتێنێ، لەپێناو ئەوەی خراپتر روو نەدا، پێویستە ئەوەی بینیمان بە هەندی وەرگرین، نادیدەگرتنی ئەو مەترسیانە دەرەنجامی مەترسیدارتری لێ دەكەوێتەوە، با لە ئێستاوە كار بۆ هەڵوەشاندنەوەی مینە بینراو و نەبینراوەكانی سەر رێگا بكەین، زۆرمان بڕیوە پێویستە بگەین.
.jpg&w=3840&q=75)
