رووداو دیجیتاڵ
ئەمڕۆ بۆ یارییەکەی بەرامبەر ڤالێنسیا لە لالیگا، هانزی فلیک پلانی گۆڕانکاری لە پێکهاتەکەیدا هەیە و گومانیش لە بەشداریکردنی لامین یامال دەکرێت کە بەهۆی پێکانەوە بەشداری لە مەشقە بەکۆمەڵەکان نەکردووە.
بارسێلۆنا رووبەڕووی یانەی ڤالێنسیا دەبێتەوە. هانزی فلیک، راهێنەری ئەڵمانی یانە کەتەلۆنییەکە، لەبەردەم تاقیکردنەوەیەکی سەختدایە بۆ دیاریکردنی پێکهاتەکەی، چونکە کێبڕکێی نێوان یاریزانان بۆ بەدەستهێنانی شوێنی سەرەکی گەیشتووەتە ئاستێکی تووند و یانەکە خاوەنی چەندین یاریزانی بەهرەمەندە لە هەموو شوێنەکانی یاریگادا.
ئەوەی کارەکانی فلیکی قورس کردووە، پێکانەکەی لامین یامالە. ئەم ئەستێرە لاوە دوێنێ تەنیا لە هۆڵی وەرزشی مەشقی کردووە و بەهۆی لێدانێکی بەهێزەوە گومانی لەسەرە بتوانێت لە یاریەکەی ئەمڕۆی ڤالێنسیا یاری بکات. فلیک دەیەوێت بە وریایی مامەڵە لەگەڵ یامال بکات، بەتایبەت کە یانەکە یارییەکی گرنگی لە چامپیۆنزلیگ بەرامبەر فاینۆرد لەپێشە.
بەپێی سەرچاوەکان تەنیا شوێنی جواو گارسیا لەناو گۆڵدا مسۆگەرە. فلیک لە دوایین یەکەی مەشقیدا دوو هێڵی بەرگری تاقی کردووەتەوە. چاوەڕوان دەکرێت ئیریک گارسیا، کوبارسی، جێرارد مارتن و ئێسپارت هێڵی بەرگری پێکبهێنن و ئیریک گارسیا کە پێشتر وەک بەرگریکاری لای راست یاری دەکرد، دوای دانیشتنی لەسەر کورسی یەدەگ لە چەند یارییەکدا، جارێکی دیکە هەلی بۆ رەخساوەتەوە.
لە هێڵی ناوەڕاستدا، فلیک چەندین بژاردەی وەک پێدری، گاڤی، دانی ئۆڵمۆ، فێرمین لۆپێز، مارک بێرناڵ، رۆدری و برایان فاریناسی لەبەردەستە. فێرمین لۆپێز کە بەوە ناسراوە بەردەوام دەچێتە ناو ناوچەی سزای بەرامبەر، رەنگە ئەمجارە لە شوێنی ئۆڵمۆ وەک یاریزانی دروستکەر یاری بکات.
لە هێڵی هێرشبەریشدا، بەهۆی ئەگەری دوورکەوتنەوەی لامین یامال، راهێنەرە ئەڵمانییەکە پەنا بۆ ئادیێمی و گۆردن دەبات بۆ ئەوەی لە باڵەکانەوە یاریبکەن و رافینیاش وەک هێرشبەری سەرەڕم یاری دەکات. گابریل جیسۆس کە تازە پەیوەندی بە یانەکەوە کردووە، ئەزموونێکی زۆری هەیە بەڵام رەنگە وەک یاریزانی یەدەگ بمێنێتەوە.
بڕیارە یارییەکە کاژێر 17:15 خولەک ئەنجام بدرێت و بارسێلۆنا دەیەوێت بە سێ خاڵەوە بگەڕێتەوە و ئامادەکارییەکی باش بۆ یەکەم یاری خۆی لە چامپیۆنزلیگ بکات
