رووداو دیجیتاڵ
یانەی بارسێلۆنای ئیسپانی بە سەرکەوتنێکی گەورە و بە ئەنجامی 5-1 بەرامبەر یانەی فاینۆردی هۆڵەندی، یەکەم هەنگاوی بۆ بردنەوەی نازناوەکە دەستپێکرد.
لە یارییەکدا کە لەسەر یاریگەی 'سپۆتیفای کامپ نو' بەڕێوەچوو، رافینیای بەرازیلی دوای تەنیا 3 خولەک لە دەستپێکی یارییەکە، بە بڕینی چەند بەرگریکارێکی فاینۆرد و بە لێدانێکی بەهێز بە پێی چەپ، گۆڵی پێشکەوتنی بۆ بارسێلۆنا تۆمارکرد.
لە خولەکی 22دا، کەریم ئادێمی جیاوازییەکەی بۆ بلاوگرانا دوو بەرامبەر کرد، دوای ئەوەی بە پاسێکی جواو کانسێلۆ و بە لێدانێکی بەهێزی پێی راست لە دەرەوەی ناوچەی سزا، تۆپەکەی خستە تۆڕی یانە هۆڵەندییەکە.
لەگەڵ دەستپێکی نیوەی دووەمدا، رافینیا دووبارە درەوشایەوە و دووەم گۆڵی خۆی و سێیەمی یانەکەی تۆمارکرد، دوای ئەوەی بە پاسێکی ورد لەلایەن پێدرییەوە ئاراستەی کرا و بە ئاسانی خستیە نێو تۆڕەوە.
لە خولەکی 60دا، ناتچۆ فێریی هێرشبەری فاینۆرد گۆڵێکی تۆمارکرد، بەڵام ناوبژیوان دوای گەڕانەوە بۆ ڤار (VAR) گۆڵەکەی بەهۆی ئۆفسايدەوە هەڵوەشاندەوە.
دوای هەوڵێکی زۆر، لامین یامالی ئەستێرەی گەنجی یانەکە گۆڵی چوارەمی بارسێلۆنای بە لێدانێکی راستەوخۆ و بە شێوازێکی سەرنجڕاکێش تۆمارکرد.
سیم ستێن ئەستێرەی فاینۆرد توانی گۆڵێک بۆ یانەکەی بگەڕێنێتەوە و ئەنجامەکە کەمبکاتەوە، بەڵام گابریێل جیسوس دووبارە جیاوازییەکەی زیاتر کردەوە و بە لێدانی سەر و لە رێگەی پاسێکی وردی یامالەوە، گۆڵی پێنجەمی بارسێلۆنای تۆمارکرد.
