رووداو دیجیتاڵ
ئانخێل دیماریا، ئەستێرەی تۆپی پێی ئەرجەنتین و یانەی رۆزاریۆ سێنترالی ئەرجەنتینی، باس لە وازهێنانی لیۆنێل مێسی لە یاریی نێودەوڵەتی دەکات و دەڵێت "وازهێنانی لیۆ بۆ هەموو ئەرجەنتینییەک زۆر زەحمەت دەبێت".
دیماریا هاوڕێیەکی نزیکی لیۆنێل مێسییە و لەبارەی یاریی رێزلێنان لە مێسی بۆ ماڵئاواییکردن لە یارییە نێودەوڵەتییەکان گوتی "بەڵێ سەیری دەکەم، ئەوە دوایین دەرکەوتنی مێسییە بە درێسی شینی ئاسمانی و سپییەوە، ساتێکی زۆر زەحمەت دەبێت بۆ هەموو ئەرجەنتینییەکان، بۆ هەموو جیهان، چونکە ئەو کاتێک لە ئەرجەنتین تاوەکو چین یان هەر شوێنێکی دیکە رۆیشتبا، یاریگاکان لەپێناو ئەودا پڕ دەبوون."
ئانخێل زیاتر قسەیکرد و گوتی "کاتێکی زۆر زەحمەت دەبێت بۆ هەموومان، بەڵام ئەمە بڕیاری ئەوە، بەڵام هەندێکجار مرۆڤ بڕیاری لەو شێوەیە دەدات و پێویستە رێزی لێبگیرێت."
دیماریا دەڵێت "وەگرتنی ئیلهام لە مێسی شتێکی زۆر نایاب و سەرنجڕاکێشە، ئەو گەورەترین یاریزانی مێژووە."
ئانخێل دیماریا، تەمەنی 38 ساڵە، یەکێک لە دیارترین ئەستێرەکانی تۆپی پێی ئەرجەنتینە لە ساڵی 2008 تاوەکو 2024 یەکێک لە کاریگەرترین یاریزانەکانی هەڵبژاردەکە بووە و لەو ماوەیەدا پەیوەندییەکی زۆر بەهێزی لەگەڵ لیۆنێل مێسی هەبووە و هاوڕێیەکی نزیکی کاپتنی تانگۆ بووە.
جگە لە بردنەوەی نازناوی مۆندیالی خوار 20 ساڵان لە 2007 و ئۆڵیمپیادی 2008، لەگەڵ هەڵبژاردەی یەکەمی ئەرجەنتین نازناوی مۆندیالی 2022ـی بردووەتەوە و لە 2021 و 2024 نازناوی کۆپا ئەمریکای بەدەستهێناوە و جاریکیش فاینالیسیمای لەگەڵ تانگۆ لە 2022 بردووەتەوە.
رۆژی 6ـی 10ـی 2026 رۆژێکی مێژوویی و گەورەیە لە تۆپی پێی ئەرجەنتین، کاتێک لە یارییەکی دۆستانەدا ئەرجەنتین میوانداریی بەنین دەکات و لەو یارییەدا لیۆنێل مێسی، بۆ دوایینجار بەدرێسی هەڵبژاردەکەوە یاریی دەکات و ماڵئاوایی لە هاندەرانی تانگۆ دەکات.
