دێربی ئیتاڵیا بۆ یەکلاکردنەوەی پێشەنگی ریزبەند

لە درێژەی یارییەکانی گەڕی 13ـی سێریا ئەی ئیتاڵیا، ئەمشەو کاژێر 22:45 یاریگەی ئالیانز ستادیۆم دەبێتە گۆڕەپانی ئەنجامدانی دێربی ئیتاڵیا لە نێوان یوڤێنتۆس و ئینتەرمیلان. 

هەردوو یانە بەباشی دەستیان بەم وەرزە کردووە، ئینتەرمیلان لە 12 یاریدا 10 بردنەوە و دۆڕانێك و یەکسانبوونێکی هەیە و بە 31 خاڵ پێشەنگی ریزبەندی خولەکەی گرتووە و چاوی لەوەیە 19ـەمین نازناوی سێریا ئەی بۆ خەزێنەی نازناوەکانی زیادبکات. 

یوڤێنتۆس کە بەهۆی شکاندنی یاساکانی یاری خاوێنەوە لە هەموو پاڵەوانێتییە ئەوروپیەکان سڕکراوە، لەم وەرزەدا هەموو سەرنجی خستووەتە سەر خولی ئیتاڵی و بە رکابەری سەرسەختی ئینتەرمیلان دادەنرێت دوای ئەوەی پێنج بردنەوەی لەسەر یەكیان تۆمارکرد و رایانگەیاند ئەوان بۆ رکابەری نازناوەکە لێرەن. بیانکۆنێری لە 12 یاریدا نۆ بردنەوە، دوو یەکسانبوون و دۆڕانێکی هەیە و بە 29 خاڵ لە پلەی دووەمی ریزبەندی دێت. 

ئەم یارییە بۆ هەردوو یانە گرنگییەکی زۆری هەیە، ئینتەرمیلان دەیەوێت بە بردنەوەی یارییەکە پێگەی خۆی لە پێشەنگ قایمتر بکات و لە رکابەرەکانی دوورکەوێتەوە. یوڤێنتۆسیش چاوی لە پێگەکەی ئینتەرمیلانە و دەیەوێت بە بەدەستهێنانی سێ خاڵی یارییەکە پێشەنگی ریزبەندی پێ چۆڵ بکات. هەرچەندە نیرازۆری بەباشترین کاتەکانیدا تێدەپەڕێت و پێشەنگی ریزبەندی گرتووە، بەڵام یانەکە هەرگیز حەز بە رووبەڕووبوونەوەی یوڤێنتۆس ناکات بە تایبەتی کە لە دوایین هەشت رووبەڕووبوونەوەی نێوانیان لە خولی ئیتاڵیا بیانکۆنێری پێنج جار ئینتەرمیلانی تووشی شکست کردووە و پێشبینی دەکرێت ئەمجارەش یارییەکی قورس چاوەڕێی ئینتەرمیلان بکات بە تایبەتی کە یوڤێنتۆس چاوی لەوەیە دوای ماوەیەکی زۆر بۆ پێشەنگی ریزبەندی بگەڕێتەوە. 

پێکهاتەی پێشبینیکراوی هەردوو یانە:

گۆڵپارێز؛ چێزنی

بەرگری: گاتی، برێمەر، روگانی

ناوەراست؛ کامبیاسۆ، مکێنی، میرێتی، رابیۆ، کۆستیچ

هێرشبەر؛ کیێزا، کین

گۆڵپارێز؛ سۆمەر

بەرگری؛ دارمیان، دی ڤرای، ئاچێربی

ناوەراست؛ دۆمفریس، بارێلا، چالهانۆگلو، میخیتیریان، دی مارکۆ

هێرشبەر؛ تورام، لاوتارۆ مارتینێز