رووداو دیجیتاڵ
ئەستێرەیەکی یاریی باسکە مێژوو تۆماردەکات و یانەی ریال مەدرید و ڤینیسیۆس جونیۆری هێرشبەری یانەکە ستایشی دەکەن.
لە خولی ئێن بی ئەی، یانەی داڵاس ماڤریکس رووبەڕووی ئاتڵانتا هاکس بووەوە و یارییەکەی بە ئەنجامی 148-143 لێبردەوە.
لوکا دۆنچیچ، یاریزانی سلۆڤینی و ئەستێرەی یانەی داڵاس ماڤریکس سەرکردایەتی یانەکەی کرد بۆ بردنەوەی یارییەکە و توانی 73 خاڵ تۆماربکات، کە ئەمە زۆرترین ژمارەی خاڵە لە مێژووی ئێن بی ئەیدا یاریزانێکی ئەوروپی تۆماریکردبێت، هەروەها چوارەم زۆرترین خاڵە یاریزانێک لە یارییەکی ئێن بی ئەیدا تۆماریکردبێت، تەنیا ویڵت چەیمبەرلین بە تۆمارکردنی 100 خاڵ و 78 خاڵ، کۆبی بڕایەنت بە 81 خاڵ لە پێش ئەستێرە سلۆڤینییەکەوەن.
لوکا لە ساڵی 2012 پەیوەندی بە یانەی ریال مەدریدی ئیسپانییەوە دەکات کە ئەوکات تەمەنی تەنیا 13 ساڵ بوو، دواتر لە ساڵی 2016 ئەوروپا بەجێدەهێڵێت و روو لە ئێن بی ئەی دەکات.
ئەستێرەکەی داڵاس تاوەکو ئێستاش پەیوەندییەکی باشی لەگەڵ یانەکەی پێشووی هەیە، دوای ئەوەی ڤینیسیۆس جونیۆر توانی لە لە یاریی کۆتایی جامی سوپەری ئیسپانیا لە بەرامبەر بارسێلۆنا هاتریک تۆماربکات، لوکا لە هەژماری فەرمی خۆی پیرۆزبایی لە ئەستێرە بەرازیلییەکە کرد.
ڤینیسیۆسیش ئەو هەلەی لەدەست نەدا و دوای ئاستە مێژووییەکەی لوکا تویتێک دەکات و دەڵێت "73 خاڵ 😅😅😅😅 ئەفسانە!!!!".
یانەی ریال مەدریدیش لە تویتێکدا دەڵێت "ناوازەیە، 73 خاڵ! ئەوە کارێکە تەنیا گەورەترین ئەفسانەکانی ئێن بی ئەی توانیویانە ئەنجامی بدەن، کە تۆش یەکێکی لەوان. پیرۆزە! هالا مەدرید!".
