رووداو دیجیتاڵ
یانەی ریال مەدرید توانی کلاسیکۆی ئیسپانیا لە بەرژەوەندی خۆی کۆتایی پێبهێنێت و بە ئەنجامی 3-2 لە بارسێلۆنا بباتەوە.
لە میانی یارییەکانی گەڕی 32ـی لالیگا، یانەی ریال مەدرید لە نێو یاریگەی سانتیاگۆ بێرنابیۆ میوانداری بارسێلۆنای کرد.
بلاوگرانا بە ئاستێکی بەرزەوە دەستی بە یارییەکە کرد و لە خولەکی شەش، لە رێگەی ئاندریاس کریستنسن گۆڵی یەکەمی یارییەکەی تۆمارکرد.
دواتر ریال مەدرید دەستی بەهێرشبردن کرد و چەند هەلێكی گۆڵتۆمارکردنی درووستکرد. لە خولەکی 17ـی یارییەکەدا، لوکاس ڤازکێز هێرشێک دەبات و دەچێتە نێو هێڵی سزای بارسێلۆنا، پاو کوبارسیی بەرگریکاری بارساش یاریزانەکە بەردەداتەوە و بەوهۆیەوە ناوبژیوان لێدانی سزا لەبەرژەوەندی یانەی شاهانە هەژماردەکات، ڤینیسیۆس جونیۆر توانی بەسەرکەوتوویی لێدانەکە جێبەجێبکات و ئەنجامەکە بۆ ریال مەدرید یەکسانبکاتەوە.
لە گێمی دووەمی یارییەکەدا، بارسێلۆنا لە هێرشەکانی بەردەوامبوو، ئەوەبوو لە خولەکی 69، فێرمین لۆپێز توانی گۆڵی دووەمی بلاوگرانا تۆماربکات و جارێکی دیکە یانەکەی پێشبخات.
ئاهەنگگێڕانی کەتەلۆنییەکان زۆری نەخایاند، لە خولەکی 73، لوکاس ڤازکێز جارێکی دیکە دەرکەوتەوە و گۆڵی یەکسانبوونی ریال مەدریدی لە یارییەکەدا تۆمارکرد.
ئەنجامی یارییەکە تاوەکو دوایین خولەکەکان بەو شێوەیە مایەوە، تاوەکو لە کاتی زیادکراوی گێمی دووەمی یارییەکەدا، جود بێلینگهام توانی گۆڵی سێیەم و سەرکەوتنی لۆس بلانکۆس لە یارییەکەدا تۆماربکات و سێ خاڵی گرنگ بۆ یانەکەی بەدەستبهێنێت.
بەم بردنەوەیە، ریال مەدرید پێگەی خۆی لە پێشەنگی لالیگا قایمترکرد، ژمارەی خاڵەکانی بۆ 81 خاڵ بەرزکردەوە و 11 خاڵ کەوتە پێش بارسێلۆنای پلەی دووەمی ریزبەندی خولەکە.
