رووداو دیجیتاڵ
یەکێتی تۆپی پێی ئیسپانیا تۆمارە دەنگییەکانی نێوان سیزار گرادۆ، ناوبژیوانی یاریی نێوان ریال مەدرید و بارسێلۆنا لەگەڵ ژووری ڤار لەبارەی گۆڵە رەتکراوەکەی لامین یامال بڵاودەکاتەوە.
لە میانی یارییەکانی گەڕی 32ـی لالیگا، یانەی بارسێلۆنا بووە میوانی ریال مەدرید و یارییەکەی بە ئەنجامی 3-2 پێدۆڕاند. لە خولەکی 28ـی یارییەکەدا، لامین یامالی هێرشبەری بارسێلۆنا لێدانێک بۆ گۆڵی ریال مەدرید لێدەدات و ئاندرێ لونینی گۆڵپارێز لەسەر هێڵی گۆڵ تۆپەکە دەردەهێنێتەوە، یاریزانانی بارسێلۆنا پێیان وابوو تۆپەکە هێڵی گۆڵی بەتەواوی بڕیوە و داوای هەژمارکردنی گۆڵەکەیان دەکرد. بەهۆی نەبوونی تەکنەلۆژیای هێڵی گۆڵ لە لالیگا، ناچار پەنا بردرایە بەر بەکارهێنانی تەکنەلۆژیای ڤار بۆ یەکلاکردنەوەی بڕیارەکە، دوای سەیرکردنەوەی دیمەنەکە لە ڤار، ناوبژیوان بەردەوامی بە یارییەکەدا و گۆڵەکەی هەژمارنەکرد بەبیانووی ئەوەی تۆپەکە بەشێکی لە دەرەوەی گۆڵەکە بووە و بەتەواوی هێڵی گۆڵی نەبڕیوە.
لەو بارەیەوە خوان لاپۆرتای سەرۆکی بارسێلۆنا هاتە دەنگ و رایگەیاند، یانەکەی داوای لە یەکێتی تۆپی پێی ئیسپانیا کردووە وێنە و تۆمارە دەنگییەکانی پەیوەست بە گۆڵە رەتکراوەکەی یامالیان بۆ بنێرن.
دوای چەند کاژێرێک لە قسەکانی لاپۆرتا، یەکێتی تۆپی پێی ئیسپانیا تۆمارە دەنگییەکانی نێوان ناوبژیوانی یارییەکە و ژووری ڤار بڵاودەکاتەوە کە گفتوگۆکانی نێوانیان بەمشێوەیەیە:
سیزار بۆ ئیلکای گوندۆگانی یاریزانی بارسێلۆنا: چاوەڕێی ڤار دەکەین بۆ یەکلاکردنەوەی بڕیارەکە، لەوانەیە گۆڵ بێت، بەڵام جارێ دەبێت سەیری دیمەنەکان بکەینەوە.
ژووری ڤار: چرکەیەک بووەستە، ئێمە لە چەند گۆشەیەکی دیکەوە سەیری دیمەنەکە دەکەینەوە. ئەم گۆشەیە بێ سوودە، ئەمەشیان سوودی نییە, لە هیچ كام لە گۆشەكانەوە دیار نییە.
سیزار: پێویست ناکات پەلە بکەین، ئەوە بڕیارێکی زۆر گرنگە. سەیری هەموو کامێراکان بکەنەوە.
ژووری ڤار: لێدانی کۆڕنە هەژماربکە، ئێمە هیچ بەڵگەیەکمان نییە کە بیسەلمێنێت تۆپەکە بەتەواوی هێڵی گۆڵی بڕیبێت، بۆیە لێدانی کۆڕنە هەژماردەکەین.
