ریال مەدرید بووە پاڵەوانی لالیگا

ئەمڕۆ شەممە، بەرواری 4-5-2024، یانەی ریال مەدرید میوانداری کادێزی کرد و یارییەکەی بە ئەنجامی 3-0 بردەوە، هەریەکە لە براهیم دیاز، جود بێلینگهام و خوسێلۆ گۆڵەکانی لۆس بلانکۆسیان تۆمارکرد. 

دواتر لە یارییەکی دیکەی خولەکەدا، یانەی جیرۆنا میوانداری بارسێلۆنای کرد. بلاوگرانا پێویستی بە بردنەوەی یارییەکە هەبوو بۆ ئەوەی هیوای گەیشتنەوە بە ریال مەدرید و رکابەریکردن لەسەر نازناوی لالیگا بهێڵێتەوە، بەڵام تووشی شکستێکی سەخت هات و بە ئەنجامی 4-2 شکستی هێنا. بەمشێوەیە جیاوازی خاڵەکانی ریال مەدریدی پێشەنگ لەگەڵ دووەمی ریزبەندی بووە 13 خاڵ و بەهۆی ئەوەی تەنیا چوار یاری لە خولەکە ماوە، یانەکانی بارسێلۆنا و جیرۆنا ناتوانن پێیبگەنەوە و یانە مەدریدییەکە وەک پاڵەوانی لالیگا دەستنیشانکرا. 

ریال مەدرید توانی بۆ 36ـمین جار لە مێژووی خۆیدا نازناوی لالیگا بەدەستبهێنێت و درێژە بە ریکۆردە مێژووییەکەی خۆی بدات وەک خاوەنی زۆرترین نازناوی خولەکە لە مێژوودا، لە پلەی دووەمیش یانەی بارسێلۆنا دێت کە خاوەنی 27 نازناوە.