رووداو دیجیتاڵ
ئیڤانا رۆدریگێز، خوشکی جۆرجینا رۆدریگێز، هاوژینی کریستیانۆ رۆناڵدۆی ئەستێرەی پۆرتوگالی، کاپتنی یانەی نەسڕی سعودیە، رەتیدەکاتەوە هیچ کێشە و ناکۆکییەک لەگەڵ خوشکەکەی یان تێکچوونی پەیوەندی لە نێوانیان هەبێت.
بەر لە چەند رۆژێک، هەندێک راپۆرتی رۆژنامەڤانی رایانگەیاند کە کێشە کەوتووەتە نێوان جۆرجینا و خوشکەکەی و گوایە نێوانیان نەماوە.
راپۆرتەکان باس لەوە دەکەن کە ئەو دوو خوشکە لە ئینستاگرام ئەنفۆڵۆوی یەکدییان کردووە، هەریەکێکیان ئەوەی دیکەیان بڵۆککردووە، ئەمە جگە لەوەی هەموو ئەو وێنانەیان سڕیوەتەوە کە پێکەوەیان گرتبوو.
بەپێی ئەوەی رۆژنامەی مۆندۆ دیپۆرتیڤۆ بڵاویکردووەتەوە، رۆژنامەنووس خاڤێر دی هۆیۆس دەستبەجێ پەیوەندی بە ماڵباتی رۆناڵدۆوە کردووە بۆ ئەوەی راستیی ئەم هەواڵە بزانێت، چونکە ئیڤانا نەک هەر بەتووندی ئەو دەنگۆیانەی رەتکردووەتەوە، بەڵکو شانازیش بەو دیارییەی ئەم دواییەی جۆرجینای خوشکەکەی دەکات کە پێیداوە، هەروەها شوقەیەکی گرانبەهای پێداوە.
ئیڤانا لە لێدوانەکانیدا، دەڵێت "خوشکەکەم شوقەیەکی گەورەی لە شاری خیخۆن لە ئیسپانیا پێداوم، ئێمە بەتەواوی رووخاندمان و نۆژەنمانکردەوە".
دوای ئەم هەواڵە، هەردوو خوشکەکە گەڕانەوە بۆ فۆڵۆوکردنی یەکدی لە پلاتفۆرمی ئینستاگرام، ئیڤاناش پشتڕاستیکردەوە کە لە رێگەی ئەکاونتەکانی سۆشیال میدیای خۆیەوە هەستی بەم گۆڕانکارییە نەکردووە.
پەیوەندی نێوان کریستیانۆ و جۆرجینا یەکێکە لە دووانە گرنگ و بەنێوبانگەکانی جیهانی تۆپی پێ، بەو پێیەی پەیوەندی نێوانیان 8 ساڵ لەمەوبەر دەستیپێکردووە.
جۆرجینا بۆ ژیان لەگەڵ رۆناڵدۆی تەمەن 39 ساڵ رووی لە سعودیە کرد، دوای ئەوەی یاریزانەکە لە مانگی یەکی ساڵی 2023 گرێبەستی لەگەڵ یانەی نەسڕ کرد، بۆ ماوەی دوو وەرز و نیو، کە تاوەکو 30ـی حوزەیرانی 2025.
