رووداو دیجیتاڵ
ڤینیسیۆس جونیۆر، ئەستێرەی یانەی ریال مەدرید و هەڵبژاردەی بەرازیل بە قۆناخێکی سەختی کاروانی وەرزشیدا تێدەپەڕێت، دوای ئەوەی لەم دواییانەدا کاریگەریی لە بەردەم گۆڵدا زۆر دابەزی، کە ئاستی گۆڵکردنی زۆر دابەزیوە.
ڤینیسیۆس لە دوایین 14 یاری لەگەڵ یانەی ریال مەدرید تەنیا دوو گۆڵی تۆمارکردووە، کە بەپێی رۆژنامەی ئەی ئێسی ئیسپانی تێکڕایی گۆڵکردنی ئەستێرە بەرازیلییەکە لە هەر 76 خولەکێکەوە بۆ گۆڵێک لە هەر 369 خولەک لەهەمان وەرزدا دابەزیوە.
ئاستی ڤینیسیۆس بەرامبەر لێگانێس لە کاتی بردنەوە زەحمەتەکەی ریال مەدرید لە لالیگا بەئەنجامی 3-2 دوای گەڕانەوەی لە پشووی نێودەوڵەتیدا، زۆر لاواز بووە، کە پێدەچێت دۆڕاندنە قورسەکەی بەرامبەر ئەرجەنتین بەئەنجامی 1-4 کاریگەرییە دەروونییەکانی قووڵتر کردبێتەوە.
ڤینیسیۆس لە دوایین 14 یارییدا تەنیا دوو گۆڵی تۆمارکردووە (بەرامبەر جیرۆنا و رایۆ ڤاییکانۆ لە لالیگا) و یەک ئەسیستی هەیە، لەکاتێکدا پێش ئەم قۆناخە بێزارکەرە لە 14 یارییەکەدا 16 گۆڵی تۆمارکردبوو.
ڤینیسیۆس بەباشترین شێوە کۆتایی بە مانگی یەک هێنا و لە 27 یاریدا 17 گۆڵی تۆمارکرد و 9 ئەسیستیشی هەبوو، بەڵام لە مانگی شوباتەوە داڕووخانی دەستیپێکرد و بەئاشکرا تێبینی ئەوە دەکرێت کە ڤینییەکەی ساڵی رابردوو، و تەنانەت بەر لە سێ مانگیش نییە.
چاودێر و شرۆڤەکاران لێکدانەوەی زۆریان بۆ هۆکارەکانی ئەو پاشەکشەیەی ڤینی کردووە و هەندێکیان دەڵێن "لەوانەیە نەبردنەوەی خەڵاتی باڵۆندۆر کاریگەری قوڵی لەسەر لایەنی هزری و دەروونی یاریزانە بەرازیلییەکە هەبێت".
هەندێکی دیکەش پێیانوایە "زۆر بیرکردنەوە لە دەستەوارە زەبەلاحەکەی سعودیە، کە بە یەک ملیار یۆرۆ لە ماوەی پێنج ساڵدا مەزەندە دەکرێت، هۆکار بێت بۆ ئەم دۆخەی ڤینی".
هەروەها بۆچوونێکی دیکەش هەیە و ئەم دۆخەی ڤینیسیۆس بە هاتنی کیلیان ئێمباپێوە دەبەستن، کە پێیانوایە ریال مەدرید بەئاشکرا کار بۆ ئەوە دەکات یاریزانە فەرەنسییەکە بکاتە پیاوی یەکەمی ریال مەدرید، ئەوەش کاریگەری زۆری لە سەر دەروونی ڤینیسیۆس دروست کردووە و ئێستا بەهەمان جۆش و خرۆشی جارانەوە یاری ناکات.
