کێشەیەکی گەورەی ژووری جلگۆڕینی بارسێلۆنا ئاشکرادەبێت

سەرچاوەیەکی ئیسپانی ئەوەی خستووەتەڕوو، تێر شتیگن دوای یاریی یەکەمی بارسێلۆنا و ئینتەرمیلان، لەڕێگەی بەڕێوەبەری کارەکانییەوە داوایەکی ئاراستەی بەڕێوەبەری وەرزشیی بارسێلۆنا کردووە بۆ ئەوەی لە یاریی دووەمدا چێزنی بکرێتە یەدەگ و ئەو گۆڵپارێزە ئەڵمانییە بەشێوەیەکی سەرەکی یاریبکات.

بەپێی سەرچاوەکە، بەڕێوەبەری وەرزشیی بارسێلۆنا داواکەی تێر شتیگنی رەتکردبووەوە و راهێنەری یانەکەش بڕیاریدابوو چێزنی بەشێوەیەکی سەرەکی یاریبکات، ئەمە وایکرد، تێر شتیگن تووڕە بێت و وەک ناڕازی دەربڕین بەرامبەر ئەو بڕیارە، لەگەڵ یانەکە نەڕواتە ئیتاڵیا و لە ئیسپانیا بمێنێتەوە.

سەرچاوەیەکی دیکەی نزیک لە یانەکە، پێش چەند هەفتەیەک گوتی، تێر شتیگن لەبەر یارینەکردنی بەرامبەر ئینتەرمیلان تووڕە بوو و لەبەر ئەوە لەگەڵ یانەکە گەشتی بەرەو میلانۆ نەکرد.

ئەمە لەکاتێکدایە، کوندێ، بەرگریکاری بارسێلۆنا، سەرەڕای پێکانەکەی، لەگەڵ یانەکە گەشتیکرد و بۆ پاڵپشتیکردنی بارسێلۆنا لە یاریگەی سان سیرۆ ئامادەبوو.

یانەی بارسێلۆنا وەک رێزێک بۆ تێر شتیگن، هیچ وردەکارییەکی ئەو کێشەیە و داواکارییەکانی ئەو گۆڵپارێزە بڵاونەکردووەتەوە و بابەتەکە وەک نهێنییەکی تایبەتی یانەکە پارێزراوە.

یانەی بارسێلۆنا وەرزی رابردوو، دوای پێکانی تێر شتیگن، بڕیاریاندا گۆڵپارێزێکی نوێ ببەنە ریزەکانی یانەکە، چێزنی، گۆڵپارێزی پۆڵەندی، لە وازهێنان گەڕایەوە و رووی لە یانەکە کرد، ئەو گۆڵپارێزە گۆڵی یانەکەی تاوەکو کۆتایی وەرز پاراست و لەو وەرزەدا یانەکە سەرکەوتوو بوو لە بردنەوەی خولی ئیسپانی، جامی ئیسپانیا و جامی سوپەر ئیسپانیا، لە چامپیۆنزلیگیش دوای دۆڕانی یانەکە بەرامبەر ئینتەرمیلان بەئەنجامی 7-6 بە کۆی دوو یاری، لە قۆناخی پێش کۆتایی پاڵەوانێتییەکە ماڵئاوایی کرد.