رووداو دیجیتاڵ
ئەمشەو یارییەکانی گەڕی سێیەم و یەکلاکەرەوەی رکابەرییەکانی قۆناخی کۆمەڵەکانی مۆندیال دەستپێدەکەن و ئەو یانانەی دەگەنە قۆناخی داهاتوو بەتەواوی یەکلادەبنەوە.
لە کۆمەڵەی دووەمدا، هاوکێشەکە ئاڵۆزە و سێ یانە رکابەری لەسەر گەیشتن بە قۆناخی داهاتوو دەکەن.
یانەی پاریس سانجێرمان دوای ئەوەی لە یاریی رابردوودا بەرامبەر یانەی بۆتافۆگۆی بەرازیلی دۆڕا، ئەمشەو بەرامبەر یانەی سیاتڵ ساوندەرزی ئەمریکی یاری دەکات و پێویستی بەبردنەوەیە بۆ ئەوەی خۆی بگەیێنێتە قۆناخی شازدەی رکابەرییەکە.
یانەی بۆتۆفاگۆی بەرازیلی و ئاتلێتیکۆ مەدریدی ئیسپانی لە یاریی لووتکەدا رووبەڕووی یەکدەبنەوە.
سیاتل ساوندەرز لەم کۆمەڵەیەدا بە دوو دۆڕانی لەسەریەک ماڵئاواییکردووە، بۆتافۆگۆ دوو بردنەوەی هەیە و پێشەنگی ریزبەندە، بەبردنەوە و یەکسانبوون لە یارییەکەی ئەمشەودا دەگاتە قۆناخی شازدە و دۆڕانیشی هێشتا هەلی سەرکەوتنی دەمێنێت.
پاریس سانجێرمان بە بردنەوە دەگاتە قۆناخی داهاتوو، بە دۆڕانی ئاتلێتیکۆ مەدرید و یەکسانبوونی یانە فەرەنسییەکەش پی ئێس جی دەتوانێت بگاتە قۆناخی شازدە.
هەردوو یارییەکە کاژێر 22:00 لە یەک کاتدا بەڕێوەدەچن، یانەیەکی دیکەی ئەم کۆمەڵەیە هاوشانی سیاتڵ ساندەرز ماڵئاوایی لە مۆندیالی یانەکان دەکات و دوو یانە دەگەنە قۆناخی شازدەی پاڵەوانێتییەکە.
