ئەلۆنسۆ بە داگیرکردنی موڵکی گشتی تۆمەتبارکرا

راهێنەری ئێستای یانەی ریال مەدرید ناتوانێت بەتەواوەتی چێژ لە سەرکەوتنە پیشەییەکانی وەربگرێت، بەهۆی هەڵمەتێکی دادوەری و میدیایی گەورە، کە دەکرێتە سەر خۆی و هاوژینەکەی بەهۆی ئەو ڤێلایەی کە دەکەوێتە سەر چیای ئیگێلدۆ لە سان سێباستیان. 

ئەو رووداوەی وەک کێشەیەک لەسەر نەخشەسازی دەستیپێکرد، گۆڕاوە بۆ هەڵمەتێکی گشتگیری بێزارکردن و رووخاندن، کە لەلایەن رێکخراوە ژینگەپارێزەکانی وەک 'ئیکۆلۆجیستاک مارتکسان' و 'هاریتزالدی ناتورزالین'ـەوە سەرپەرشتی دەکرێت.

ئەم رێکخراوانە جارێکی دیکە سکاڵاکانیان چالاک کردووەتەوە، ئەمجارەیان لە نووسینگەی داواکاریی گشتی و ئەنجوومەنی شارەوانی، کە کۆمپانیای پەرەپێدانی  تاڤارۆ، کە لەلایەن ناگۆڕی ئارانبۆرۆی هاوژینی چابی ئەلۆنسۆوە بەڕێوەدەبرێت بە ئەنجامدانی تاوانی گومانلێکراو تۆمەتبار کردووە، کە پەیوەستن بە پێشێلکارییەکانی نەخشەسازیی شارستانی و زەوتکردنی موڵکی گشتی. 

بەگوێرەی ئەو رێکخراوانە، خانووەکە دەکەوێتە سەر رێگایەکی شارەوانی کە مۆڵەتی بەکارهێنانی لە مانگی ئاداری 2025ـەوە بەسەرچووە، بەڵام خێزانی راهێنەرەکە هێشتا بەکاریدەهێنن.

مێژووی ئەم کەیسە بۆ کاتێکی دوور دەگەڕێتەوە، بەڵام لەبەرئەوەی چابی ئەلۆنسۆ یەکێکە لە دیارترین سیماکانی ئێستای تۆپی پێی ئیسپانیا، گرنگیی کەیسەکە زیاتر بووە. 

لەساڵی 2023 بڕیارێکی دادوەری دەرچوو کە دروستکردنی ڤێلاکەی بەنایاسایی دانا، ئەمەش بڕیارێکە کە هێشتا لە دادگای باڵای هەرێمی باسک تانەی لێدەدرێت و ئێستا گرووپە چالاکوانەکان گوشارەکانیان زیاتر دەکەن، نەک تەنیا لەڕووی یاساییەوە، بەڵکو لەڕووی کۆمەڵایەتیشەوە، ئەویش لەڕێگەی لێدوانی ئاشکراوە کە تێیدا ئەنجوومەنی شارەوانی بە دەستتێکەڵکردن لەگەڵ بەرژەوەندییەکانی یاریزانی پێشووی ریال مەدرید و راهێنەری ئێستای ئەو یانەیە.