رووداو دیجیتاڵ
لە گەڕی نوێی رکابەرییەکانی سێری ئایدا، رۆما و ئینتەرمیلان لەسەر یاریگەی ئۆڵۆمپیکۆ بەیەکدەگەن و ململانێ لەپێناو هەڵکشانی زیاتر بەرەو لووتکەی خولەکە، بەسەر یارییەکەدا زاڵ دەبێت.
رۆژی شەممە کاژێر 21:45 بە کاتی باشووری کوردستان، لە رۆمای پایتەخت، یانەی شارەکە، میوانداریی ئینتەرمیلان دەکات. بەر لە یارییەکە رۆما بە 15 خاڵ لە شەش یارییەوە لە پلەی دووەمی خولەکەدایە، لەکاتێکدا ئینتەر بە 12 خاڵ لە پلەی چوارەمدایە.
لەژێر راهێنەرایەتی جیان پیێرۆ گاسپێرینی، رۆما لە رووی بەرگرییەوە بەهێز بووە، تەنیا دوو گۆڵی لە شەش یاریی یەکەمیدا لێکراوە. بەڵام هێڵی هێرشبردنیان کەمتر کاریگەری هەبووە، تەنیا حەوت گۆڵی تۆمارکردووە. ماتیاس سۆلێ ئاستێکی باشی پێشانداوە و تا ئێستا سێ گۆڵی تۆمارکردووە و گۆڵکەری یانەکەیەتی.
ئینتەرمیلانی کریستیان کیڤۆی راهێنەر، لەهێڵی هێرشبردنیدا سەرنجڕاکێش بووە، 17 گۆڵی لە شەش یاریی یەکەمیدا تۆمارکردووە. سەرەڕای نەبوونی مارکۆس تورام بەهۆی پێکانەوە، یاریزانانی وەک لاوتارۆ مارتینێز و ئانج یۆان بۆنی لە ئاستێکی باشدابوون و بە شێوەیەکی بەرچاو بەشدارییان لە گۆڵەکانی ئەم وەرزەی تیپەکەدا کردووە، بەڵام لە رووی بەرگرییەوە وەکو پێویست نییە و 8 گۆڵی لێ تۆمارکراوە.
چاوەڕوان دەکرێت یارییەکە جەنگێکی تاکتیکیی بێت. رۆما ئامانجی دەبێت پتەویی بەرگرییەکەی خۆی بپارێزێت، لەکاتێکدا رووبەڕووی هێرشی بەهێزی ئینتەر دەبێتەوە. لە بەرامبەردا ئینتەر هەوڵدەدات بەردەوام بێت لەسەر ئاستە بەهێزەکانی هێرشبردنیدا.
