رووداو دیجیتاڵ
ریال مەدرید لە دەرەوەی یاریگەی خۆی سەرکەوتنێکی سەختی بەئەنجامی 2-1 بەرامبەر ئالاڤێس بەدەستهێنا، ئەم ئەنجامە نەک تەنیا بۆ کێبڕکێی نازناوی لالیگا گرنگ بوو، بەڵکو بۆ چابی ئەلۆنسۆی راهێنەریش چارەنووسساز بوو، کە توانی لە مەترسی دوورخستنەوە رزگاری بێت، سەرەڕای ئەوەی بەشێک لە راپۆرتەکان ئاماژەیان بەوە دەکرد کە یارییەکە هەرچۆنێک بێت، ئەلۆنسۆ دەردەکرێت.
مێرینگی لە خولەکی 24دا لە رێگەی کیلیان ئێمباپێ پێشکەوتنی بەدەستهێنا، کە دوای هێرشێکی رێکخراو، بە لێهاتوویی لە ناوچەی سزاوە تۆپەکەی کردە گۆڵەوە، ئالاڤێس بۆ ماوەیەکی زۆر کۆنترۆڵی تۆپی کرد و ریتمی یارییەکەی بەدەستەوە بوو، بەمەش مەدریدی ناچار کرد زیاتر بەرگری لە دواوە بکات.
لە نیوەی دووەمدا، خاوەن یاریگە پاداشتی کۆنترۆڵکردنی یارییەکەیان وەرگرتەوە، لە خولەکی 68دا، کارلۆس ڤیسێنتی ئەنجامەکەی بۆ ئالاڤێس یەکسان کردەوە، بەمەش گوشارەکانی سەر مەدرید و دەستەی راهێنەران زیاد کرد.
بەڵام مەدرید بە خێرایی وەڵامی دایەوە، لە خولەکی 76دا، رۆدریگۆ لە رێگەی هێرشێکی پێچەوانەی خێراوە گۆڵی یەکلاکەرەوەی تۆمار کرد، کە دوای پاسێکی ڤینیسیۆس جونیۆر، بە متمانەوەوە تۆپەکەی خستە گۆڵەوە.
ئالاڤێس لە ساتەکانی کۆتایی یارییەکەشدا بەردەوام بوو لە باڵادەستبوون بەسەر تۆپەوە و گوشاری دەکرد بۆ تۆمارکردنی گۆڵی یەکسانبوونەوە، بەڵام ریال مەدرید بەرگەی گرت و سێ خاڵی یارییەکەی مسۆگەر کرد.
بەم ئەنجامە، ریال مەدرید لە پلەی دووەمی ریزبەندی لالیگا مایەوە و بەردەوامە لە گوشار خستنە سەر بارسێلۆنای پێشەنگ، لە کاتێکدا ئالاڤێس لە پلەی 12دا مایەوە، سەرەڕای ئەوەی ئاستێکی بەهێزی لەرووی خاوەندارێتی تۆپەوە پێشکەش کرد.
