بڕیارێکی کوشندە و لەناکاو لە ئاربێلواوە

لەکاتێکدا کەس چاوەڕوانی ئەم هەنگاوە بوێرەی نەدەکرد، مژدەی قۆناخێکی نوێ لەناو ماڵی ریال مەدریددا دەستیپێکرد. ئەلڤارۆ ئەربێلوا لە یەکەمین بڕیارە بوێرەکانیدا دوای وەرگرتنی ئەرکی راهێنەرایەتی، بڕیارێکی دا کە بووە هۆی هەژاندنی ناوەندە وەرزشییەکانی مەدرید. بڕیارەکە پەیوەندی بە یاریزانێکی ناودارەوە هەیە کە دوای هەرایەکی زۆر و چاوەڕوانییەکی درێژ گەیشتە سانتیاگۆ بێرنابیۆ، بەڵام پێدەچێت خەونەکەی زۆر کورت بێت.

لەناو ژوورە تاریکەکانی بڕیاردان لە یانە شاهانەکە، ئەو بڕوایە لای ئەربێلوا دروست بووە کە ئەم ئەستێرەیە لەگەڵ فەلسەفە و شێوازی نوێی یاریکردنی یانەکە ناگونجێت. مانەوەی ئەم یاریزانە، بەپێی دیدگای ئەربێلوا، تەنیا دەبێتە هۆی تێکدانی هاوسەنگیی ئەو پڕۆژە نوێیەی کە دەیەوێت لەسەر بنەمای 'یەکگرتوویی و تووندوتۆڵی' بونیادی بنێت.

ئەلڤارۆ ئەربێلوا بەڕاشکاوی بە کارگێڕیی یانەکەی راگەیاندووە "ترێنت ئەلێکساندەر ئارنۆڵد ئەو پارچە گونجاوە نییە کە بۆ پلانەکەم بشێت".

راهێنەرە ئیسپانییەکە پێیوایە ئارنۆڵد لەڕووی بەرگرییەوە کێشەی گەورەی هەیە و بووەتە هۆی دروستبوونی کەلێنێکی دیار لە هێڵی دواوەدا. بەلای ئەربێلواوە، ناکرێت تیپەکە قوربانی بە سیستمی بەرگری بدات تەنیا بۆ ئەوەی یاریزانێک لە پێکهاتەکەدا بێت کە لە ئەرکە سەرەکییەکانی بەرگریدا دەستەوەستانە.

ئەربێلوا کە خۆی پێشتر یەکێک بوو لە بەرگریکارە تووندەکانی مەدرید، جەخت لەسەر ئەوە دەکاتەوە کە ئارنۆڵد لەڕووی جێگیربوون و رووبەڕووبوونەوەی تاکەکەسیدا شکستی هێناوە. ئەمەش وایکردووە هێڵی بەرگری هەمیشە لە دڵەڕاوکێدا بن بۆ داپۆشینی هەڵەکانی ئەو، ئەمەش لە قامووسی ئەربێلوادا هێڵی سوورە.

تەنانەت ئەو لایەنە هێرشبەرییەی کە ئارنۆڵد پێی ناسراوە، نەبووەتە فریادڕەس بۆی. ئامارەکان ئاماژە بەوە دەکەن کە یاریزانە ئینگلیزییەکە نەیتوانیوە ئەو زیادە مەزنە پێشکەش بکات کە چاوەڕێی لێدەکرا. دابەزینی ئاستی جەستەیی و سەرنەکەوتن لە گونجاندن لەگەڵ کەشی لالیگادا، وایکردووە ئەربێلوا بگاتە ئەو ئەنجامەی کە: ئەو بەرگریکارەی نە لە هێرشدا جیاوازی دروست بکات و نە لە بەرگریدا دڵنیایی بدات، تەنیا دەبێتە بارگرانی بۆ سەر تیپەکە".

ئێستا ریال مەدرید دەرگای بۆ سیناریۆیەک کردووەتەوە کە پێشتر لە پلانەکاندا نەبوو؛ فرۆشتنی ئارنۆڵد!

کارگێڕیی یانەکە ئامادەن گوێ لە دەستەوا بگرن کە لە خولی ئینگلیزییەوە بۆی دێن. ئەم هەنگاوە نەک تەنیا بودجەیەکی باش بۆ یانەکە دەگەڕێنێتەوە، بەڵکو رێگە خۆش دەکات بۆ گواستنەوەی بەرگریکارێکی هاوسەنگتر کە لەگەڵ داواکارییەکانی ئەربێلوا بگونجێت.

لە بێرنابیۆ، هەمووان هەست بەوە دەکەن کە کاتەکانی ئارنۆڵد بەرەو کۆتایین. پەیامەکەی ئەربێلوا روون و کورتە:  لێرە ناوی گەورە یاری ناکات، بەڵکو تەنیا ئەو کەسە دەمێنێتەوە کە لەناو یاریگەدا جەنگاوەرە و خزمەت بە پڕۆژەکە دەکات.