رووداو دیجیتاڵ
جود بێلینگهام بە بەرپرسانی یانەی ریال مەدریدی راگەیاندووە کە هێنانی یاریزانێک کێشەکانی تیپەکەیان چارەسەر دەکات و کارگێڕیی مێرینگی لێکۆلینەوە لە پێشنیازی یاریزانە ئینگلیزەکەی دەکات، کە ئەو گرێبەستە 70 ملیۆن یۆرۆی پێویستە، بەڵام لەوانەیە داهاتووی تیپەکە بەتەواوی بەرەو باشتر بگۆڕێت!
دەستەی کارگێڕیی ریال مەدرید زوو دەستی بە جوڵە کردووە بۆ دیاریکردنی شێوازی تیپەکەی لە وەرزی داهاتوودا، ئەمەش لە کاتێکدایە کە داواکارییەکی روون لەنێو ژووری جلگۆڕیندا هەیە بۆ بەهێزکردنی هێڵی ناوەڕاستی تیپەکە لە رێگەی ئەنجامدانی گرێبەستێکی ستراتیژی کە توانای دروستکردنی جیاوازی هەبێت لە پاڵەوانێتییە گەورەکاندا.
بێلینگهام گوشار دەکات بۆ تەواوکردنی گرێبەستەکە
جود بێلینگهام پەیامێکی راستەوخۆی ئاراستەی کارگێڕیی وەرزشیی یانەکە کردووە و داوای کردووە پەلە بکەن لە گرێبەستکردن لەگەڵ ساندڕۆ تۆنالی، یاریزانی ئیتاڵیی یانەی نیوکاسڵ یونایتد، کە نرخی بازاڕی بە نزیکەی 70 ملیۆن یۆرۆ دەخەمڵێندرێت.
یاریزانە ئینگلیزییەکەی ریال مەدرید، پێیوایە تیپەکە پێویستی بە یاریزانێکی چەقی ناوەند هەیە کە توانای رێکخستنی ریتمی یارییەکە، پشتگیریکردنی سیستمی بەرگری و گەرەنتی بەردەوامیی کۆنترۆڵکردنی تۆپی هەبێت لەژێر گوشاردا.
بۆچی بەتایبەتی تۆنالی؟
تۆنالی لە خولی نایابی ئینگلیزیدا خۆی وەک یەکێک لە تەواوترین یاریزانانی ناوەڕاست لەڕووی تاکتیکییەوە سەلماندووە. ئەو یاریزانێکە هێزی بەرگری، کوالیتی پاسدان و دیسپلینی تاکتیکی لە یەک یاریزاندا کۆدەکاتەوە، لەگەڵ توانای لەئەستۆگرتنی بەرپرسیارێتی لە یارییە گەورەکاندا.
لە روانگەی بێلینگهامەوە، گرێبەستکردن لەگەڵ تۆنالی هاوسەنگییەکی زیاتر بە هێڵی ناوەند دەبەخشێت و هەندێک یاریزانیش لەو رۆڵانە رزگار دەکات کە لەگەڵ تایبەتمەندییە هونەرییەکانیاندا ناگونجێن.
دووانەیەکی نموونەیی لەگەڵ چوامینی
بێلینگهام پێیوایە تۆنالی دەتوانێت لەگەڵ ئۆریلیان چوامینی دووانەیەکی تەواو بەتوانا پێکبهێنێت، بەجۆرێک کە چوامینی هێزی جەستەیی و پتەویی بەرگری دابین بکات، لەکاتێکدا یاریزانە ئیتاڵییەکە رێکخستن و خێرایی لە گۆڕانکاری لە بەرگرییەوە بۆ هێرشبەر بە تیپەکە دەبەخشێت. ئەم هاوسەنگییە بەهۆکارێکی یەکلاکەرەوە دادەنرێت بۆ کێبڕکێکردن لەسەر نازناوی خولی ئیسپانی و خولی یانە پاڵەوانەکانی ئەورووپا.
بڕیارێکی وەبەرهێنان بە سوودێکی درێژخایەن
پەیامەکەی بێلینگهام روونە: وەبەرهێنان لە یاریزانێکدا لەم ئاستەدا خۆشگوزەرانی نییە، بەڵکو پێویستییەکە بۆ دوورکەوتنەوە لە دووبارەبوونەوەی قەیرانەکانی دوو وەرزی رابردوو. بڕی 70 ملیۆن یۆرۆ لەوانەیە زۆر دەربکەوێت، بەڵام هەنگاوێکی ستراتیژییە بۆ دووبارە داڕشتنەوەی ناسنامەی هێڵی ناوەڕاست و بنیاتنانی پێگەیەکی کێبڕکێی بەهێز بۆ داهاتوو.
لە ریال مەدرید ئێستا روون بووەتەوە کە یەکێک لە گرنگترین ئەستێرەکانی تیپەکە، تۆنالی وەک پارچەیەکی سەرەکی بۆ پڕۆژەی قۆناخی داهاتوو دەبینێت، وەک گرێبەستێک کە دەکرێت گۆڕانکارییەکی راستەقینە لە رێڕەوی تیپەکەدا دروست بکات. بۆیە کارگێڕیی مێرینگی ئەوە بەجددی لەبەرچاو دەگرێت.
