رووداو چیرۆکە نەبیستراوەکانی زیندانی سیدنایا دەگێڕێتەوە

قەمەر دەڵێت پێیان گووتوە لەژێر زەوییەکە زیندانی نهێنی هەیە دەوێت هەر چۆنێک بێت لەوە دڵنیا بێتەوە. 

بە چەکووش و قازمە کەوتووەتە سەر زەوییەکە بە ئومێدی ئەوەی ئاسۆیەک لە تاریکیی ژێر زەویدا دەرکەوێت. 

قەمەر ئەحمەد دەڵێت: "هەموو دنیا قسە لەسەر ئەم کۆمەڵکوژی و کارەساتە دەکات کە بەسەرمان هاتووە، باشە ئەی بۆچی نایەن لێرە هاوکاریمان بکەن، بۆچی نایەن بگەڕێن لەگەڵمان تا بگەینە زیندانەکانی ژێر زەوی، باشە من بەدەست و بە قازمە چۆن دەتوانم شتێک بدۆزمەوە، بەخوا هیچ مافێکی مرۆڤ نییە. ئاژەڵ لەم وڵاتە هەزار جار لە مرۆڤەکان مافی زیاترە، تەواو ئیتر." 

تۆماری گرتووخانەکان بەشێوەیەک پەرشوبڵاو بوونەتەوە، گەر کەسێک بەدوای ناوی زیندانییەکانیشدا بگەڕێت بە ئەستەم شتێکی دەستدەکەوێت، لەگەڵ ئەوەشدا هێشتا بێ هیوا نین و بەردەوام خەریکی گەڕانن، بۆ دۆزینەوەی چارەنووسی زیندانییەکان." 

خوشکی ریزان عەبدولقادر مەلا حەمزە کە بێسەروشوێنە دەڵێت: "هاتووم بەدوای ناوی براکەم دەگەڕێم لە 10ـی مانگی چواری 2014ـەوە بێسەروشوێنە، هەرچەند دەگەڕێین هیچ شتێکمان لەبارەیەوە دەست ناکەوێت، تا ئەم ساتە بێسەروشوێنە. 

دانیا حەکیم، دایکی بێسەروشوێنبوو دەڵێت: "بەردەوامین لە گەڕان، پشتمان بەخوا قایمە، بەڵام داوا دەکەین هاوکاریمان بکەن باشە زیدانییەکان چۆن بدۆزینەوە، کوڕە تاقانەکەم لەکوێیە؟" 

زیندانی سیدنایا، لە ساڵانی هەشتاکان لەلایەن حافز ئەسەدەوە دروستکراوە، بە دووریی 30 کیلۆمەتر دەکەوێتە باکووری دیمەشق. 

زیندانەکە لە دوو باڵەخانە پێکدێت، یەکێکیان بە باڵەخانەی سپی و ئەوی دیکە بە سوور ناسراوە. توانای لەخۆگرتنی 15 بۆ 20 هەزار زیندانیان هەبووە، لە راپۆرتە نێودەوڵەتییەکاندا هاتووە، هەزارەها زیندانی بەنهێنی لە ژێر زەمینی باڵەخانە سوورەکە لە سێدارەدراون.