بە وێنە و ڤیدیۆ؛ لە سووریا بەنزین بە کوالێتیی باشتر و نرخی هەرزانتر دەفرۆشرێت

یەکێک لە بەنزینفرۆشەکان بە رووداوی گوت، لیتری بە 17 هەزار و 500 لیرەی سووری دەفرۆشن کە دەکاتە 1.1 دۆلاری ئەمریکی؛ ئەمە کەمترە لەو نرخەی پێش رووخانی حکومەتەکەی بەشار ئەسەد هەبوو. 

بەنزینفرۆشەکە دەڵێ "هەموو رۆژێک کاژێر 06:00ـی بەیانی دەچمە لوبنان کە نزیکەی کاژێرێکم پێدەچێت. رۆژانە 20 گاڵۆن بەنزین دەهێنم و تاوەکو ئێوارە دەیفرۆشم."

بۆ هەر جارێک چوون و هاتنەوە، بەنزینفرۆشەکە دوو کاژێری پێدەچێت. ئەو، هەروەها دەڵێ "بەهۆی قەیرانی بەنزین لە سووریا، ئێمە بووینەتە هۆی ئاسانکردنی کاری شۆفێرەکان. بەنزین لە سووریا زۆر کەمە بەهۆی ئەوەی گوشار لەسەر حکومەت هەبوو." 

پێش رووخانی حکومەتی بەشار ئەسەد، 10 رۆژ جارێک، شۆفێران 25 لیتر بەنزینیان لەلایەن حکومەتەوە پێدەفرۆشرا، لەکاتێکدا پێویستییەکەیان زۆر لەوە زیاترە. 

بەو هۆیەوە شۆفێران ناچاربوون لە بازاڕی رەش بەنزین بکڕن کە نرخەکەی زۆر زیاتر بوو. ئەمەش ئەرکی هاووڵاتییانی قورستر کردبوو. 

بەنزینفرۆشێکی دیکە دەڵێ "ئێستا بەنزین باشتر دەستدەکەوێت. بۆیە چیدیکە لە بازاڕ بەنزین ناکڕین. پێشتر فرۆشیارەکان نرخێکی زیاتریان دادەنا و بەنزینەکەش کوالێییەکی کەمتری هەبوو. هەروەها، ئاو، چەند جۆرێک رووەک و گوڵیان دەکردە نێو بەنزینەکەوە، بۆیە لەبری ئەوەی 10 لیترمان پێبفرۆشن، 7 لیتر بەنزینیان پێدەداین." 

دوای نزیکەی دوو هەفتە لە رووخانی حکومەتی ئەسەد، خەڵکی دیمەشق دەڵێن، بەنزین بەبێ باج و گومرگ دەبردرێتە شارەکەوە، بەو هۆیەوە بە نرخێکی کەمتر بەنزین لە شەقامەکان دەفرۆشرێت. ئەمەش خەڵکی دڵخۆش کردووە.