رووداو دیجیتاڵ
هێزەکانی سووریای دیموکرات (هەسەدە) رایگەیاند، رۆژی شەممە هێرشێکی گرووپە چەکدارەکانی سەر بە دیمەشقیان لە گوندەواری رۆژهەڵاتی رەققە تێکشکاندووە و هۆشداریی ئەوەشیان دا کە لەبەرامبەر دووبارەبوونەوەی ئەو جۆرە "دەستدرێژییانە دەستەوەستان نابن."
ناوەندی راگەیاندنی هەسەدە لە راگەیێندراوێکدا گوتی: "ئەمڕۆ هێزەکانمان لە بەرەی گوندی غانم عەلی لە گوندەواری رۆژهەڵاتی رەققە رووبەڕووی هێرشێکی لەناکاو بوونەتەوە" و ئاماژەی بەوەشکرد، گرووپە هێرشبەرەکان "درۆنی بۆمبڕێژکراو و چەکی قورسیان" بەکارهێناوە.
هەسەدە جەختی کردەوە کە "ئەو هێرشە بێهوودەیەیان تێکشکاندووە" و ئاماژەی بەوەش کرد، پێکدادانەکان بوونەتە هۆی برینداربوونی سێ لە شەڕڤانەکانیان بە "سووکی"، هەروەها "برینداری پشتڕاستکراوە لە ریزەکانی گرووپە دەستدرێژیکارەکاندا" تۆمارکراوە.
راگەیێندراوەکە سرووشت و ناسنامەی گرووپە هێرشبەرەکانی بە وردی رووننەکردووەتەوە و تەنیا ئاماژەی بەوە کردووە کە "گرووپی سەر بە حکومەتی دیمەشقن."
هەسەدە دەڵێت، ئەم جۆرە هێرشانە "سووربوونی ئەو لایەنانە لەسەر بردنەپێشەوەی ناوچەکە بەرەو ئاڵۆزی و پووچەڵکردنەوەی هەموو هەوڵەکانی پاراستنی سەقامگیری" دەسەلمێنێت.
راگەیێندراوەکە جەختی لەوە کردووەتەوە کە وەڵامی هێزەکانیان "گونجاو بووە لەگەڵ سرووشتی دەستدرێژییەکەدا، لەگەڵ پابەندبوونی تەواو بە دانبەخۆداگرتن و رێگریکردن لە فراوانبوونی بازنەی پێکدادانەکان."
هەسەدە هۆشدارییەکی روونیشی دا و رایگەیاند: "لەبەرامبەر دووبارەبوونەوەی ئەم هێرش و وروژاندنانە دەستەوەستان نابین و رێوشوێنی گونجاو دەگرینەبەر بۆ پاراستنی ناوچەکانمان، هێزەکانمان و گەلەکەمان لە هەر هەڕەشەیەک."
لەبارەی ئەو لایەنانەی پشتیوانیی لەو گرووپانە دەکەن، هەسەدە داوای کرد "کۆنترۆڵیان بکەن و کۆتایی بە کردەوە نابەرپرسیارانەکانیان بهێنن، چونکە مەترسیی راستەوخۆ لەسەر ئاسایش و سەقامگیریی تەواوی ناوچەکە دروست دەکەن."
