رووداو دیجیتاڵ
هێزەکانی ئاسایشی ناوخۆی سووریا رایگەیاند، لە کاژێر 17:00ی ئێوارەی ئەمڕۆوە سەرجەم دەروازە ئاوییەکانی پارێزگای دێرەزوور تاوەکو کاتێکی نادیار دادەخرێن و تەنیا بۆ پێداویستییە مرۆییەکان کراوە دەبن.
بەپێی راگەیێندراوێکی فەرماندەیی ناوخۆیی، بڕیارەکە دەروازە نافەرمییەکان و بەلەمی پەڕینەوە لەسەر رووباری فورات دەگرێتەوە، کە ناوچەکانی ژێر دەسەڵاتی حکومەت لە رۆژئاوا و ناوچەکانی ژێر دەسەڵاتی هێزەکانی سووریای دیموکرات (هەسەدە) لە رۆژهەڵات لێک جیادەکاتەوە. ئەمەش دوای زنجیرەیەک رێوشوێنی هاوشێوە دێت کە پێشتر لە ئەم ساڵدا گیرابوونەبەر، هاوکاتیشە لەگەڵ بەردەوامیی گرژییەکانی گەڕەکە کوردییەکانی حەلەب لەنێوان سوپای عەرەبیی سووریا و هێزەکانی ئاسایشی سەر بە بەڕێوەبەرایەتیی خۆسەر.
لە لایەکی دیکەوە، ئاژانسی فەرمیی هەواڵی سووریا - سانا، لە زاری سەرچاوەیەکی ئەمنییەوە بڵاویکردەوە، رێگەی سەرەکیی نێوان رەققە و دێرەزووریش تاوەکو کاتێکی نادیار داخراوە، ئەوەش سنووردارکردنی زیاتری هاتووچۆیە لەنێوان ناوچە سەرەکییەکانی بەڕێوەبەرایەتیی خۆسەر.
داخستنەکان لە کاتێکدان پێکدادانی پچڕپچڕ و رووداوی لە دوای رووخانی رژێمی پێشوو لە کۆتایی 2024ـەوە بەردەوامە. هەرچەندە شەڕە سەرەکییەکە لەم رۆژانەی دواییدا لە گەڕەکە کوردییەکانی حەلەب چڕبووەتەوە، کە دوای شەڕێکی سەخت ئاگربەستێکی ناسک راگەیێندراوە، بەڵام ناوچەکانی رۆژهەڵاتیش هێرشی ناوبەناوی بەخۆوە بینیوە، لەوانەش دروستبوونی شەڕ لە نێوان هەسەدە و هێزەکانی ئاسایشی ناوخۆ لە گوندەواری دێرەزوور لە 8ـی کانوونی دووەمدا.
دەروازە ئاوییەکانی دێرەزوور، کە زۆرجار بۆ بازرگانی، سەردانی خێزانی و گواستنەوەی کەلوپەل لەنێوان هەردوو دیوی رووباری فورات بەکاردەهێنرێن، پێشتریش رووبەڕووی داخستن بوونەتەوە. رێوشوێنی هاوشێوە لە ئۆکتۆبەری 2025 گیرایەبەر و بووە هۆی تێکچوونی دۆخی ئابووری، بەرزبوونەوەی نرخ و کەمیی پێداویستییەکان لە ناوچەکەدا. لە سەرەتای کانوونی دووەمی 2026ـیشدا هۆشداری لە داخستنی دەروازەکان لە ناوچەکانی وەکو عەشارە درابوو، کە هاوکات بوو لەگەڵ هاتنی هێزی سەربازی بۆ کەناری رووبارەکە.
ئامانج لەم رێوشوێنە نوێیانە تووندکردنەوەی کۆنترۆڵی حکومەتی دیمەشقە بەسەر هاتووچۆی ناوچەکە، لە کاتێکدا حکومەت هەسەدە تۆمەتبار دەکات بە دزەکردن، قاچاخچێتی و پاڵپشتیکردنی لایەنەکانی دژی حکومەت. بەرپرسانی سووریا زۆرجار هەسەدە بەوە تۆمەتبار دەکەن کە هێزە ئەمنییەکان و خەڵکی سڤیل دەکاتە ئامانج. هەسەدە تۆمەتەکان رەتدەکاتەوە و حکومەت بە پێشێلکردنی رێککەوتنەکانی پێشوو تۆمەتبار دەکات.
