رووداو دیجیتاڵ
هێزەکانی ئاسایشی ناوخۆی بەڕێوەبەرایەتیی خۆسەر لە گەڕەکە کوردنشینەکانی حەلەب رایدەگەیێنێت، سێ تانکی هێزەکانی حکومەتی سووریایان تێکشکاندووە کە نەخۆشخانەیەکیان لە گەڕەکی شێخ مەقسوود تۆپپباران دەکرد. ئاماژە بەوەش دەکات، درۆن نەخۆشخانەکە دەکاتە ئامانج.
ناوەندی راگەیاندنی هێزەکانی ئاسایشی ناوخۆ لە حەلەب، لە نوێترین راگەیێندراویدا لەبارەی شەڕ و پێکدادانەکان ئاشکرای کرد، ئەندامانیان توانیویانە "سێ تانکی سەر بە میلیشیاکانی حکومەتی دیمەشق" تێکبشکێنن.
بەگوێرەی راگەیێندراوەکەی ئاسایش، تێکشکاندنی ئەو تانکانە لەکاتێکدا بووە سەرقاڵی تۆپبارانکردنی نەخۆشخانەی خالید فەجر بوون لە بەشی رۆژئاوای گەڕەکی شێخ مەقسوود.
ئاسایش دەڵێت، شەڕی کۆڵان بە کۆڵان لە ناوچەکە بەردەوامە و هاوکات لەگەڵ بۆردوومانی چڕی تانکەکان، "درۆنی تورکیا لە جۆری بایراکتار" بەشێوەیەکی راستەوخۆ نەخۆشخانەکە دەکەنە ئامانج.
ناوەندی راگەیاندنی ئاسایش هۆشداری دەدات لەوەی، نەخۆشخانەکە پڕە لە برینداری سڤیل و ئەو دۆخە "پەرەسەندنێکی مەترسیدارە" کە ژیانی سڤیل و تیمە پزیشکییەکانی خستووەتە مەترسییەوە.
