رووداو دیجیتاڵ
مەزڵووم عەبدی، فەرماندەی گشتیی هێزەکانی سووریای دیموکرات پەیامێکی ڤیدیۆیی لەبارەی رێککەوتن لەگەڵ دیمەشق بڵاوکردەوە و رایگەیاند: "توانیمان دەستکەوتەکانی گەلی خۆمان و تایبەتمەندی ناوچەکانمان بپارێزین".
میدیای نزیکی بەڕێوەبەرایەتیی خۆسەر پەیامەکەی فەرماندەی گشتیی هێزەکانی سووریای بڵاوکردەوە، مەزڵوم عەبدی رایگەیاند: "لەسەر ئەو رێککەوتنەی کراوە، مەبەستمان بوو، پرسەکان بۆ گەلی خۆمان روون بکەینەوە.''
مەزڵوم عەبدی دەڵێت: "مەبەستمان بوو شەڕ روونەدات، مخابن ئەو شەڕە پلانی بۆ دادەنرێت لەلایەن کۆمەڵێک هێزەوە، ئەو شەڕەمان لەسەر سەپێنرا".
فەرماندەی گشتیی هەسەدە گوتیشی، "بۆ ئەوەی شەڕەکە نەبێتە شەڕی نێوخۆ کە بەمشێوەیە پلانی بۆ دانرابوو، بۆ ئەوەی خەڵکی سڤیل نەکوژرێت، بۆیە قبووڵمان کرد لە ناوچەکانی رەققە و دێرەزوور بەرەو حەسەکە بکشێینەوە .''
لەبارەی رێککەوتنە 14 خاڵییەکەیان لەگەڵ دیمەشق، فەرماندەی هەسەدە دەڵێت: "توانیمان دەستکەوتی شۆڕش و دەستکەوتی گەلی خۆمان بپارێزین، توانیمان تایبەتمەندی ناوچەکانمان بپارێزین، بۆ ئەوەش هێزی پێویستمان هەیە .''
لە کۆتایی پەیامەکەیدا ، مەزڵوم عەبدی دەڵێت:" ئەو تێکۆشانە ماوە درێژە، گەلی ئێمە، رێکخستنەکانمان و هەڤاڵانمان وەکو چۆن لە شەڕدا سەرکەوتن، لەو تێکۆشانەشدا سەردەکەون .
