رووداو دیجیتاڵ
فەرماندەیی گشتیی هێزەکانی سووریای دیموکرات (هەسەدە) لە راگەیێندراوێکدا پابەندبوونی تەواوی خۆی بەو ئاگربەستە راگەیاند کە لەگەڵ حکومەتی دیمەشق لەسەری گەیشتوونەتە لێکتێگەیشتن.
رۆژی سێشەممە 20-01-2026 هەسەدە بڵاویکردەوە، هێزەکانیان بە تەواوی پابەندی ئاگربەست دەبن و دەستپێشخەریی هیچ کردەیەکی سەربازی ناکەن، تەنیا لەو کاتەدا نەبێ رووبەڕووی هێرش دەبنەوە.
هەسەدە باس لەوە دەکات، دەرگەیان بۆ رێگەچارەی سیاسی، گفتوگۆ و دانوستاندن کراوەیە و ئامادەن بۆ جێبەجێکردنی بڕگەکانی رێککەوتنی 18ـی کانوونی دووەم بە جۆرێک کە خزمەت بە ئارامی و سەقامگیری بکات.
ئەم هەڵوێستەی هەسەدە دوای زنجیرەیەک گۆڕانکاریی سیاسی و سەربازیی یەکجار خێرا دێت کە ئەمرۆ لە گۆڕەپانی سووریا روویاندا.
پێشتر سەرۆکایەتیی سووریا و وەزارەتی بەرگری رایانگەیاندبوو، لەگەڵ هەسەدە گەیشتوونەتە لێکتێگەیشتنی نوێ و لە کاژێر 20:00ـی ئەمشەو سێشەممە 20-01-2026ـەوە ئاگربەستێکی چوار رۆژە دەستپێدەکات تاوەکو هەسەدە پلانێکی ورد بۆ تێکەڵکردنی ناوچەکان و هێزەکان دادەڕێژێ.
