رووداو دیجیتاڵ
هێزە ئەمنییەکانی تورکیا لە ئۆپەراسیۆنێکدا کە لە پارێزگای یۆزگات بەڕێوەچوو، پێنج هاووڵاتیی عێراقییان بە تۆمەتی ئەندامیێتی داعش دەستگیرکرد.
ئۆپەراسیۆنەکە رۆژی پێنجشەممە، 28ـی کانوونی یەکەمی 2023، لەسەر راسپاردەی داواکاری گشتیی یۆزگات دەستیپێکرد، دوای ئەوەی بە تۆمەتی ئەندامیێتیی داعش فەرمانی گرتنی بۆ پێنج هاووڵاتیی عێراقی دەرکرد.
لە چوارچێوەی ئۆپەراسیۆنەکەدا، تیمەکانی سەربە فەرماندەیی جەندرمەی پارێزگا، هەڵیانکوتایە سەر چەندین ناونیشان و پێنج کەسە داواکراوەکەیان دەستگیرکرد.
دوای جێبەجێکردنی رێکاری یاسایی، پێنج کەسەکە رەوانەی دادگە کران و لەلایەن دادگەوە بە تۆمەتی ئەندامێتیی داعش خرانە زیندانەوە.
