رووداو دیجیتاڵ
قوتابییەکی قۆناخی ئامادەیی قوتابخانەی ئەنادۆڵ لە ناوچەی ئەیوب سوڵتان لە ئیستەنبووڵ، بە چەک هێرشی کردە سەر بەڕێوەبەری قوتابخانەکەی و دەستڕێژی گولـلەی لێکرد، دواتریش هەڵات.
بەڕێوەبەری قوتابخانەکە بە سەختی بریندار بووە و هێرشکەرەکەش بەر لەوەی پۆلیس بگاتە شوێنی رووداوەکە، لە شوێنەکە هەڵاتووە. تیمەکانی فریاکەوتنی تەندروستی بەڕێوەبەرەکەیان گەیاندووەتە نەخۆشخانە.
لەدوای رووداوەکە، پۆلیسی ئیستەنبووڵ دەستی بە لێکۆڵینەوەکانی کردووە بۆ زانینی هۆکاری هێرشکردنەکە، دۆزینەوە و دەستگیرکردنی قوتابییەکە.
بەپێی ئەو زانیارییانەی لەسەر رووداوەکە بڵاوکراونەتەوە، هێرشەکە کاژێر 10:00ی بەیانی روویداوە. ئەو کەسەی هێرشەکەی کردووە خەڵکی عێراقە و ناوی (ی. ک)ە.
بەدواداچوونەکانی پۆلیس گەیشتوونەتە ئەوەی، قوتابییەکە لە مانگی 12ی پار تووشی کۆمەڵێک کێشە بووە لەگەڵ ئیبراهیم ئۆکتوگان، بەڕێوەبەری قوتابخانەکەی، دواتریش بە بڕیاری قوتابخانە لە خوێندن دەرکراوە و لە وەرزی خوێندنی 2023 - 2024 بێبەش کراوە.
