رووداو دیجیتاڵ
ئایلا ئاککوش، بەرپرسی رێکخستنەکانی دەم پارتی لە ئیدر کە دەستگیرکرابوو، بە بڕیاری دادوەر زیندانی کرا.
چوار رۆژ دوای دەستگیرکردنی، ئایلا ئاککوش، ئەمڕۆ (شەممە، 22-2-2025) بە بڕیاری دادگەی ئیستەنبووڵ خرایە گرتووخانە و پرۆسەی دادگەییکردنی بەردەوام دەبێت.
ئۆپەراسیۆنەکە رۆژی 18-2-2025 لە چوارچێوەی لێپرسینەوەی داواکاری گشتیی ئیستەنبووڵ لە ئیدری باکووری کوردستان کرا.
تیمەکانی ئاسایشی ئیدر هەڵیانکوتایە سەر ماڵی ئایلا ئاککوش و دەستگیریان کرد.
بەگوێرەی ئەو راپۆرتەی لەبارەیەوە ئامادەکراوە، ئاککوش بە "هاوکاریکردن و ئەندامبوون لە رێکخراوی تیرۆرستیی چەکدار" تۆمەتبارکراوە، هەر لەبەر ئەو تۆمەتەش دەستگیرکراوە.
ئەو بەرپرسەی دەم پارتی بۆ لێکۆڵینەوە گواسترایەوە ئیستەنبووڵ.
لەم هەفتەیەدا لە 51 پارێزگای تورکیا و باکووری کوردستان، ئۆپەراسیۆن بەڕێوەچوون و زیاتر لە 300 کەس دەستگیرکران. ئەمڕۆش بە بڕیاری دادوەر 30 لەو دەستگیرکراوانە خرانە گرتووخانە.
