رووداو دیجیتاڵ
لە رووداوێکی هاتووچۆدا لە پارێزگای چاناکالەی تورکیا سێ ئۆتۆمبێل خۆیان بەیەکدادا و لە ئەنجامدا هەشت کەس گیانیان لەدەستدا.
رووداوەکە ئەمڕۆ شەممە، 10ی ئایاری 2025 لە رێگەی سەرەکیی ئەزینە- چاناکالە روویدا؛ پاسێکی گەشتیاری، بارهەڵگرێک و ئۆتۆمبێلێک خۆیان بەیەکدادا.
عومەر تارامان، پارێزگاری چاناکالە لەبارەی رووداوەکەوە رایگەیاند، 8 کەس گیانیان لەدەستداوە و 20ـی دیکەش بریندار بوون.
بە گوتەی عومەر تارامان، ئێستا بریندارەکان لە نەخۆشخانەن و لە بەشی چاودێریی چڕ چارەسەر وەردەگرن.
پار لە تورکیا و باکووری کوردستان ملیۆنێک و 444 هەزار و 27 رووداوی هاتووچۆ روویاندا. لەو رووداوانەدا شەش هەزار و 352 کەس گیانیان لەدەستدا و 385 هەزار و 117 کەسی دیکەش بریندار بوون.
